Звенигово оласе Йоча сымыктыш школышто Калыкын тӱҥалтышыжлан полшымо толкынын районысо форумжо эртен.
Республикыштына кок ий ончыч шочшо тиде толкын Провой кундемыштат шке еҥже-влакым муын. Нуно ӱмаште эртыше республиканский форумышто лийыныт, сандене районысо мероприятийын площадкылаштыже модератор семын пашам ыштеныт.
Залыш бюджет аланыште тыршыше, мер пашаеҥ, ветеран да молат погыненыт да районысо кучемын еҥже-шамыч дене Провой кундемын илышыж нерген шинчаваш мутланеныт, поснак – кундемым тӱзатыме аланыште калыклан кӱлешан проект-влакым илышыш пуртымо, историй дене кылдалтше памятник ден шарнымаш-шамычым арален кодымо, йоча-влак дене пашам ыштыме, волонтёр толкыным вияҥден колтымо шотышто.
Форумын участникше-влакым Звенигово район администрацийым вуйлатыше Владимир Геронтьев саламлен. «Йоча пагытын лу ийже» площадкын пашажым «Ника» ПТФ» ООО директорын экономике йодыш дене алмаштышыже, икшыве-шамычлан спорт дене заниматлаш йӧным ыштыме верч шогышо Евгений Кальянов виктарен. «Историй шарнымаш» площадкын модераторжо Чакмарий школын директоржо, кушкын толшо тукымым патриотизм шӱлышеш воспитатлыме шотышто кугу пашам шуктышо Владимир Кашков лийын. «Айдемым верже огыл сӧрастара», «Поро кид – шокшо шӱм» площадкылаштат чолга еҥ-влак пашам ыштеныт, да шуко пайдале каҥаш йоҥгалтын.
Площадке-влакын панельный дискуссийыштышт Марий Эл правительстве председательын алмаштышыже Илга Дравниеце ден Образований институтын ректоржо, Калыкын тӱҥалтышыжлан полшымо толкынын регионысо штабшын вуйлатышыже Лариса Овчинникова лийыныт да форумыш толшо калыкын мер илышыште шкем чолган ончыктымыжым сай велым палемденыт. А участник-влак шкешт велым Звенигово районын да олан Депутатше-влакын погынымашыштын депутатше Февзи Керимовлан тӱҥалме чыла пашаштышт уло кумылын полшымыжлан тауштеныт.
«Шонымашда сай, тудын негызеш командын вийже дене гына шукташ лийме проект-влакым ямдылаш кӱлеш. Тыге веле пашадан кӱлешлыкшым ончыкташ да илыме верланда вияҥаш оксам муаш йӧн лиеш», – форумым Звенигово муниципальный районын вуйлатышыже Наталья Козлова мучашлен.
М. ИВАНОВА
