УВЕР ЙОГЫН

Эн сай почтальон – марий ӱдырамаш

Россий почтын Марий Элысе филиалже почтальон ден почтым шупшыктышо водитель-влаклан профессиональный мастарлык конкурсым эртарен.

Тушко куд почтальон ден кум водитель ушненыт. Нунылан шке пашаштым шуктымаште теорий да практик шинчымашым ончыкташ кӱлын. Мутлан, почтальон-влак паша правилым, инструкцийым палымышт шотышто тестированийым эртеныт, пеш писын почтым адресат марте намиен шукташ манын, тудым кӱлеш семын ямдыленыт, стандартный огыл ситуаций гыч лектын мошташыштат кӱлын.

 Почтальон-влак коклаште икымше верыш Йошкар-Оласе 6-шо номеран отделений гыч Людмила Кузьмина лектын. Марий ӱдырамаш ты отрасльыште 38 ий ышта, тышеч 14 ийже отделений начальникат лийын. Сулен налме канышыш лекмекыже, угыч тыглай почтальонлан куснен.

Кокымшо верыш Медеведево почтамт гыч Марина Зверева, а кумшыш Морко почтамт гыч Татьяна Боброва лектыныт.

Водитель-влак коклаште Шернур почтамт гыч Георгий Пекпулатов ойыртемалтын. Сеҥыше-влаклан диплом ден шарнымашан пӧлекым кучыктеныт. А икымше верыш лекше участник-влак Марий Элысе почтовик-влакын лӱмыштым Юл кундемысе тыгаяк конкурсышто аралаш тӱҥалыт Тудо 4 июньышто Йошкар-Олаштак лиеш.

 С.Носова

 Снимкыште: республикын эн сай почтальонжо Л.Кузьмина.

Опубликовать в Одноклассники

Добавить комментарий