Таче тиде поҥго нерген каласкалена. Уке гын шукынжо тудын нерген шагал палат але йӧршынат колын огытыл, очыни.
Майысе поҥгым вес семынже эше ошпоҥго, шошо мландывоҥго, шемшудывоҥго, «рядовка майская», «Майка», «Георгиев гриб» маныт.
Кушто шочеш?
Майысе поҥго май-июньышто шочеш. Тудым вольык коштмо, лышташан пушеҥге кушмо верлаште, изирак чодыралаште тӱшка дене кушшым муаш лиеш.
Мо дене пайдале?
Тиде поҥгышто антибиотик вещества манме уло. Тудо туберкулез палочкылан вияҥашыже чаракым ышта. Тыгак рак ваштарешат кучедал кертме вийже уло. Чӱчкыдын кочкаш гын, вӱрыштӧ сакыр иземеш. Диабетымат сеҥаш полша, костный ткань манмым, вуйдорыкын пашажым саемда, тӱрлӧ пуалше лийме деч утара. Майысе поҥго – сай антиоксидант.
Кушто кучылталтеш?
Тиде поҥго гыч тӱрлӧ кочкышым ямдылат. Тудын ойыртемалтше пушыжо чылаштланак огеш келше. Но тудым пытараш куштылго. Тидлан поҥгым лавыра деч эрыктыман, мушман да 1-2 шагат шинчалан вӱдыштӧ шинчыктыман, вара пел шагат наре шолтыман.
Майысе поҥгым жаритлаш, шинчалташ да мариноватлаш лиеш.
«Сурт-пече» газетын коҥга ончылныжо
Майысе поҥго
Шернур район Марисола ял гыч Зинаида Васильевна Ермаковам шукынжо моткочак марий шӱлышан айдеме семын гына огыл, эше тале поҥгызо да колызо семын палат. Таче тудын тиде поҥго гыч ямдылыме шӱр рецептшым темлена. Ик секретым ойлем: ме икмыняр ий ончыч кочкын онченна да моткочак келшен ыле. Тиде тамым алят шижына…
Поҥго шӱр
«Шӱрым мый тыге ямдылем. Поҥгым мушкам, эрыктем да падыштем. 3 литр вӱдлан ик кугу кӱмыж тыгыдемдыме поҥгым пыштем, шинчалым ешарем да, шолаш пурымекше, тул ӱмбалне эше 20 минут кучем. Вара тышкак поҥго нареак пареҥгым падыштен пыштем, вигак шоганым ешарем. Пареҥге кӱмешке шолтем да тул ӱмбач кораҥгем. Шӱр ямде!»
А ынде Интернет гыч налме рецептым темлена.
Кӱлеш: 300 г поҥго, 100 г торык сыр, ик шоган, ик кешыр, кок пареҥге, изишак ушкал ӱй, 1 лавр лышташ, ужар шоган, там шот дене пурыс да шинчал.
Тыге ямдылыман: поҥгым эрыктыман, мушман да тыгыдын пӱчкедыман. Шоганым эрыктыман, тыгыдемдыман. Кешырым кугурак рожан тёрко гоч колтыман. Пареҥгым эрыктыман да кубик семын пӱчкедыман.
Салмашке ӱйым пыштен, шоган ден кешырым жаритлыман. Тышкак поҥгым ешарыман да эше 10 минут жаритлыман. Ынде каструльышто шолшо вӱдыш чыла тидым опталман, лавр лышташым, пареҥгым, шинчал ден пурысым пыштыман, 20 минут шолтыман. Тылеч вара шолшо вӱдыштӧ торык сырым шулыктарыман да шӱрыш пыштыман, эше 5 минут тул ӱмбалне кучыман. Шӱр ямде лиймеке, тушко ужар шоганым падыштен пыштыман.
«Французла» поҥго
Кӱлеш: 0,5 кг Майысе поҥго, 120 г кушкыл ӱй, 0,25 л ош вино, 300 г наре ушкал шыл лем, 300-350 г ветчина, 8 шултыш кинде.
Тыге ямдылыман:
Сотейникыш кушкыл ӱйын пел ужашыжым темыман, тушко олым пырче семын пӱчкедыме поҥгым пыштыман да пассироватлыман. Вара изин-изин лемым, пытартышлан ош вином ешарен, икмыняр минут тушитлыман.
Салмаште ветчинам жаритлыман, ӱмбакше ямде поҥгым опталман да гренке дене кочман.
Перкан лийже!
Л. КАМАЛЕТДИНОВА.
М. Скобелевын да авторын фотошт
