УВЕР ЙОГЫН

Памятникым шоналтен вераҥдыман

Йошкар Ола мэрийын темлымыжым шотыш налын, Марий Эл Кугыжаныш Погынын президиумжо эртыше кечылаште пунчалым луктын: мемнан землякна,  композитор, фронтовик, СССР Кугыжаныш  да Ленинский премий лауреат, СССР-ын калык артистше Андрей Яковлевич Эшпайлан памятникым Йошкар-Оласе ик скверыште (тудыжо Машиностроитель уремыште, Красноармейский ден Свердлов уремла коклаште) шогалташ. Но вер келшен ок тол: Андрей Яковлевич «Дружба» стадионыш коштын огыл.

Мый умылем, Россий кугыжанышын уло властьше – чиновник-влакын кидыштышт. Нуно шке семынышт, калык дене каҥашыде, тыгай пунчалым луктыт. Памятникым кушто да кӧлан вераҥдыме шотышто шоналташ кӱлеш. Йошкар-Олаште Андрей Яковлевичын уло творческий илышыже Палантай лӱмеш музыкальный училище дене кылдалтын. Кызыт тудо колледж маналтеш. Мылам тиде лӱмжат нимынярат огеш келше.

Памятниклан эн чот келшыше вер – музыкальный училище воктене.

Тыгаяк шонымашан улыт Андрей Яковлевичын эргыже, кинорежиссёр Андрей Андреевич, ден пелашыже Александра Михайловна Эшпай. Памятникым вес верыш шогалтыме дене нуно огыт келше!

Марий Эл Кугыжаныш Погын президиумлан Эшпайлан памятникым вераҥдыме шотышто ончыч лукмо пунчалышт да музыкальный училище пелен тудым келыштарыме шотышто шоналташ темлем.

В.В.Шапкин,

РФ-н да РМЭ-н сулло артистше,

Кугыжаныш премий-влакын лауреатше.

Снимкыште: В.Шапкин ден А.Эшпай репетиций годым. 2012 ий 17 май.

Фотом Республикын колыштмо-ончымо документ-влак кугыжаныш архивше гыч налме

Опубликовать в Одноклассники

Добавить комментарий