ПӰСӦ ЙОДЫШ

Эн вучымо да кӱлешан кунам толын шуэш?

«Кӧ тидыже?» — йодыда. «Кӧ» огыл, а «мо» — пӱртӱс газ. Кунам тудо пӧртышкак толеш, могай сай! Пум ыштен, торф брикетым налын, коҥгаш олтен толашышаш уке. Адакшым мыняр окса  аныклалтеш?! Тыгай ласка да йӧнан илышлан кузе от куане?!

Но чылт чылаштланак огыл тыгай пиалже шыргыжалын. Республикыштына эше шагал огыл ялла ден илемлаште «канде тул» уке.

У Торъял районыштат тудо кажнышкыжак толын шуын огыл. Тидын нерген район администраций вуйлатыше В.Блинов дене мутланышна.

 

— Василий Васильевич, районыштыда эше могай кундемыш пӱртӱс газым шупшмо огыл? Мыняр илем тудым пуртыдымылан кӧра  йӧндымылыкым шижын ила?

— Кызытсе жаплан поселкышто 57 процент кумдыкыш газым пуртымо. А район мучко тиде кугыт изиш утларак. Тачысе кечылан кум кундем кодын: Пектубай, Шура да Кӱанпамаш вел. «Газпромын межрегионгаз Йошкар-Ола» ООО Элембай гыч Пектубай марте шупшаш проектым тений ышта. Тылеч вара «канде тулым» пурташ тӱҥалшаш улыт. Но тыгодым теве могай нелылык вашлиялтеш: Пектубай велне ӱлыкшӧ куатан газ пучым шупшаш оксам республик пуышаш, а тидым ышташ черет мемнан деке эше шуын огыл. Эн ончычак вес районышто ты пашам шукташ тӱҥалыт. Сандене Пектубайыш газ 2020-2021 ийлаште веле толын шуэш, очыни.

— А районыштыда газым молан эн ончыч Пектубайыш, а вес илемыш огыл пурташ палемдалтын? Тудын кугу улмыжо шотыш налалтын?

— Туге. Молышт дене таҥастарымаште Пектубай — кугурак кундем. Тушко пуртен шуктена гын, район мучко 70 процент нарыш газ пучым шупшмо лиеш.

— А Шура ден Кӱанпамаш велне илыше-влак тиде куанле татым кунам вучен шуктат?

—  Газым кушко да кунам пуртымо шотышто «Газпромын» пеҥгыдемдыме планже уло. Паша тушто палемдыме почеш ышталтеш. Тудын дене келшышын, мемнан районыш «канде тул» варарак толын шуэш. 

«Газпром» ден Ялозанлык да продовольствий министерстве посна программышт почеш кызыт газым синхронизаций йӧн дене (ял ден ялла коклаште иканаште) пуртен огыт керт.  Тиде амал дене ты паша кок-кум ийлан шӱкалалтеш. Ончыкыжым Ялозанлык да продовольствий министерствыш лекташ да «Селам социально вияҥдымаш» программе почеш мыланна федеральный оксам пуышт манын тыршаш тӱҥалына. Кызытсе план почеш, Шура ден Кӱанпамашыш пӱртӱс газым 2023 ийыште пуртышаш улыт. Но тӱрлӧ амал дене паша ала эше идалыклан  шӱкалалтеш – раш каласаш огеш лий. Иктым ойлен кертам: тидыже верысе кучем, ял шотан илем, калык дене кылдалтын огыл. Шке семын да шке вий дене ме нимом ыштен огына сеҥе. Ты паша пӱтынек — «Газпромын». Российыште южо кундем дене таҥастарымаште Марий Эл кугун газифицироватлыме регионлан шотлалтеш, вет южо субъектыште тудым палынак шагал шупшмо. Туге гынат, газым пуртымо паша мемнан денат вашке ышталташ тӱҥалеш манын, ӱшанен кодына.

Любовь Камалетдинова  

Опубликовать в Одноклассники

Добавить комментарий