Тыгай лӱман выставке Марий Турек районысо краеведений тоштерыште эртен. Тушто тӱҥ экспонат гармонь лийын. А нуныжо могай да кушто гына ыштыме ончыкталтын огытыл: Саратовысо – оҥгыран, Вологодский, Шуйский, Вятский, Тульский, тыгак йоча, «марла», «Беларусь», «Троянда», эсогыл умша гармонь, гармонь-тальянке, аккордеон, баян-шамыч. Тоштерыш толшо-влакым нине ӱзгар сылне семышт дене куандареныт да оҥай историйышт дене ӧрыктареныт.
Ончерлан эн шуко экспонатым Энгербал ял гыч Вадут Хафизов конден, вет тудын мӧҥгысӧ коллекцийыштыже 30 утла гармонь, баян да аккордеон уло. Мутлан, эше кочажланак пӧлеклыме да але мартеат аралалт кодшо умша гармоньлан 200 утла ий!
Пӧръеҥ семӱзгар-влакым пога веле огыл, моткочак устан шокта. Арам огыл тӱрлӧ конкурсышто ик гана веле огыл сеҥышыш лектын. Пудыргат гын, нуным шкежак ачала.
Выставкыште семӱзгар-влак гына огыл ончыкталтыныт, тыгак районысо уста да палыме гармоньчо-влакын фотографийыштым ужаш йӧн лийын.
Л.Камалетдинова.
