Волжск гыч 18 ияш Артём Коровин вӱдым куэн кайыме дене (байдарке, каноэ, 24 ияш марте) Российын первенствыштыже бронзо призёр лийын.
Краснодарыште Артём 2018 ийысе тӱнямбал чемпион, Санкт-Петербург гыч 23 ияш Владислав Блинцов дене пырля таҥасен. Нуно байдарке дене 1000 метр кужытышто кумшо верым сеҥен налыныт.
Юл кундем гыч рвезе эше икмыняр дистанцийыште кум гана лу эн тале спортсмен коклаш логалын. Тренерже Е.Мещераковын палемдымыж почеш, нине стартым шотыш налын, Артёмым Европын первенствылан ямдылалташ ӱжыныт. Тудыжо 11-14 июньышто Чехийыште лиеш.
Е.Эшкинина.
