Марий Турек районышто тений 28,8 тӱжем гектар икияш пырчан да отызан кушкылым ӱдаш палемденыт. Тидыже республикыште эн кугу кумдык.
Ӱмаште тиде районым кукшо игече эн чот «тӱкен», сандене пырчым гектарлан шотлымаште 13 центнерым веле шийын сеҥеныт. А тений ятырлан утларак поген налаш палемденыт да кызыт ага тургымлан ямдылалт шуаш тыршат. Чумыр технике гыч 90 утла процентшым ачален шогалтыме. Нурыш 167 тракторым луктыт. Кокияшым палемдыме деч шукырак ӱден кодымо, мландым кугурак кумдыкышто кылмаш куралме, урлыкашым утыждене шапашлыме. Шошо агалан 3,8 тӱжем тонн минеральный ӱяҥдыш кӱлеш гын, «Росагро», «Мари-Куптинский», «Галеон», «Ладога» ООО-влак 700 утла тонным конденыт. А теве дизтопливым, бензиным кызытеш пеш шагал шапашлыме.
В.Смоленцев.
