УВЕР ЙОГЫН

«Сеҥымаш кече, могай тораште лийын тудо…»

Давид Тухманов ден Владимир Харитоновын «Сеҥымаш кече» мурышт  амал деч посна огыл Сеҥымаш кечын атрибутышкыжо савырнен. Мурын кажне ойжо, шомакше Кугу Отечественный сарыште совет калыкнан мом чытен лекмыжым ушештара да тудын лӱддымылыкшым, чытышыжым, куатшым чапландара. 9 майыште Кугу Отечественный сарыште сеҥымылан 74 ият теме. Молгунамсе семынак тиде кечын Российын кугурак олалаштыже военный парад-влак эртеныт. Йошкар-Оласе гарнизон-влакын войскаштымат ты кечын ола уремыште ужын кертынна. 30 утла тӱрлоо калык гыч лекше салтак-влак призыв почеш мемнан военный частьлаште службым эртат. Тыгак почешышт полицийын, УФСИН-ын, МЧС-н, Росгвардийын, суд пристав-влакын, моло ведомствын  пашаеҥышт, кадет-влак рыҥ тошкалын эртеныт. «Ярс» ракет комплексым да РВСН-ын кызытсе жаплан келшыше моло военный техникыжымат ончыктеныт. А чыла тидым трибуно гыч Кугу Отечественный сарын ветеранже-влак ончен да кугешнен кертыныт.  

Парадын участникше-влакым Марий Эл вуйлатыше Александр Евстифеев саламлен. Тудо палемден: 9 май элыштына илыше уло калынан эн чот аклыме пайремже, тӱрлӧ национальностьым ушышо державынан куатшым да чапшым, икоян улмыжым пеҥгыдемдыше кече. «Тиде кече Сеҥымашым кондышо-влакын тукымышт дене кылдалтын. Ннуныншт шке илышыштым чаманыде, уло тӱням фашизм деч утарен коденыт да сар деч вара совет элнан ола ден яллажым угыч йол ӱмбаке шогалтеныт. Ме тачысе пиалан илышлан лач нунылан парымнам шӧрышаш да тауштышаш улына», – каласен регион вуйлатыше.

Кугу Отечественный сарыш Марий кундем гыч 140 тӱжем еҥ каен. Кажне кокымышыжо тушеч пӧртылын огыл. 53 еҥже шке подвигшылан Совет Ушем Герой чап лӱм дене палемдалтын. Ме кажныжым шарнаш тӱҥалына да мланде марте вуйнам савена. Таклан огыл  пытартыш ийлаште парад дене пырля «Курымашлык полк» акций эртаралтеш. Кажне ийын тушко утларак еҥ ушна. Тений тушто шке тукым гыч веле огыл, вес тукым гыч лекше сарын участникшын портретшымат наҥгаяш лийын.  

А Сеҥымаш кече деч ончыч Александр Евстифеев сарын участникше-влак дене шкежак вашлийын. Тушко тыгак чолга самырык еҥ ден волонтёр-влакым ӱжыныт. А.Евстифеев кажне ветеранын кидшым кормыжтен тауштен да Россий Президентын саламлымашыжым лудын пуэн. Каласен кодыман, тачысе кечылан  республикыштына ты шучко сарын 200 наре участникше гына кодын. Тыгак сар годым тылыште тыршыше 1500 еҥ ила. Приемыш толшо-влак чайым подыл мутланен шинченыт, эртыше шучко жапым шарналтеныт. А шарналташыже кажне ветеранын уло мом. Кеч мемнан кундемыште сар каен огыл гынат, тудо кугу Сеҥымашыш изи огыл надырым пыштен. Вет тунам Марий кундемыш Совет Ушемын тӱрлӧ республикыж гыч 40 тӱжем наре еҥым, тыгак шуко предприятийым кусареныт. Марий калык дене пырля нунат Сеҥымашым тылыште тапташ полшеныт.

«Курымашлык полк» акций тений республикыште 45 тӱжем наре еҥым ушен. Марий рӱдолаште гына 25 тӱжем наре еҥ ошкылын. Кажнжын вуй ӱмбалныже сарын участникшын портетше лийын. Регион вуйлатыше Александр Евстифеев Совет Ушем Герой чап лӱм дене палемдалтше землякна Василий Степанович Архиповын портретшым наҥгаен. Тудын лӱмжым Йошкар-Оласе, Семеновко селасе урем-влаклан, тыгак Семеновкысо школлан пуымо.

Сеҥымаш кечын Йошкар-Олаште шуко мероприятий эртен. Кажныже сарыште лийше-влакым чапландарыше, шарныктыше да нунылан тауштымо шӱлышан лийын. 

С.Носова.

 М.Скобелевын фотожо.

 

Опубликовать в Одноклассники

Добавить комментарий