Март гыч май марте Шернур районысо тӱвыра да каныме рӱдерыште «Гармонь пайрем» эртен.
Тудо Кугу Отечественный сарыште сеҥымылан 74 ий теммылан пӧлеклалтын. Василий Тёркинын кубокшо верч турнирыште Шернур, Марий Турек, Параньга, Кужэҥер, У Торъял, Советский районла, тыгак Татарстан Республикысе Балтач, Киров кундемысе Уржум районла гыч гармонист-влакын 8 командыже мастарлыкым ончыктен, таҥасен.
5 майыште семӱзгарым шоктышо-влакын финалышт лийын. Тушто Шернур ден Параньга районла гыч эн тале гармоньчо-шамыч таҥасеныт. Сеҥышыш шернур каче-влак лектыныт. Лач нуно Василий Тёркинын кубокшын да турнирын тӱҥ призшын — гармоньын — озаже лийыныт.
А.Байкова
