Звенигово олаште Юл серым эрыкташ тӱҥалыныт.
Ушештарена, оласе кучем эҥер серын реконструкцийже шотышто кугу проектым ямдылен да тудым Москваште арален кертын. Ынде нине планым илышыш пурташ федеральный рӱдер кугу оксам ойыра.
А план чынжымак моткоч кугу: портым, эҥер вокзалым, йолын коштмо кумдыкым, у спорт площадкым, ракывот шотан сценым да монь чоҥыман… Но тылеч ончыч эҥер серым ямдылыман.
Кушкылым пӱчкеден, руэн кораҥдымым ужын, оласе-влак кокла гыч шукышт азапланаш тӱҥалыныт. Тыге шол, калыклан эсогыл сай шонымаш дене келшаш неле. Сандене верысе администраций проектым мучаш марте шуктымым вучалташ да вара паша лектышым аклаш йодын.
Калыкын Юл серысе ужар кушкылым кораҥдыме шотышто азапланымыжым умылаш лиеш, вет тудо шке кундемжын ончыкылыкшо верч тургыжлана. Кучемынат оласе-влакын шонымыштым шотыш налмыжым, нунын дене вашлийын мутланымыжым, ой-каҥашышт дене келшымыжым сай велым палемдыман.
М.ИВАНОВА
