Шокшо жап лишемме семын инфекций шотышто поснак лӱдыкшо эллаш тарваныше турист-влак койын шукемыт.
Нине инфекций кокла гыч малярийым, холерым, нарынче йӱштымужым (лихорадка) палемдаш лиеш. Но канен пӧртылмӧ годым Россий Федерацийыш элыштына тымарте регистрироватлыдыме инфекциян моло черымат пуртен кертме лӱдыкшӧ уло.
Инфекций шотышто лӱдыкшӧ эл кокла гыч россиян-влак утларакше Индийыш, Вьетнамыш, Африкыш коштыт. Нине кундемыште поснак кодшо ийын озаланыше Эбола йӱштымужо дене черланыше кызытат вашлиялтеш. Тидымак шотыш налын, кажне турист йот элыште шке гигиеныжым эскерышаш, шолтыдымо вӱдым йӱшаш огыл, кочмо деч ончыч чыла пакчасаскам, емыж-саскам да мӧрым сайын мушшаш.
Поснак лӱдыкшӧ инфекциян эллашке тарваныме деч ончыч шуэн огыл прививкым ышташ йодыт. Мутлан, Саудовский Аравийыш кайыме деч 10 кече ончыч менингоккок инфекций деч прививкым ыштыкташ кӱлеш, Кечывалвел Америкыш да Африкыш тарваныме годым – нарынче йӱштымужо деч.
М.ИВАНОВА
