Марий Элысе ОНФ-ын чолга еҥже-влак Волжск оласе администрацийыш Советский уремыште озанлык шӱкшакым оптымо санкционироватлыдыме свалкым кораҥдыме йодыш дене лектыныт. Общественник-шамыч ончычсо оралте-влак деч кодшо петырыдыме икмыняр нӧрепын лӱдыкшӧ улмышт нерген ушештареныт.
Шӱкшакым кышкыме нине верым оласе калык ОНФ-ын «Генеральный уборко» проектшын интерактивный картыштыже палемден.
«Волжск оласе кучем калыкын йодмыжым шотыш налеш да тиде кумдыклан тӱткышыжым ойыра манын ӱшанена», – палемден Марий Элысе ОНФ-ын «Экологий» теме дене площадкыжын модераторжо Артем Поздеев.
М.ИВАНОВА
