26 апрельыште Йошкар-Оласе Благовещений башньыште «Марий Эл Республикын поликультурный картше» проект почеш Морко районлан пӧлеклалтше выставке почылтын.
Тушто Морко кундемын сылне верлажым ончыктышо, чапланыше да лӱмлӧ еҥже-влакын (С.Чавайн, В.Мухин-Сави, М.Казаков да молат) фотоштым, нуным илыме жапышт дене кылдалтше арверым, вургемым ужаш лиеш. Башньын ик пӧлемже Унчо кундемлан пӧлеклалтын ыле. Вет лач 2019 ийыште Унчо финн-угор калыкын рӱдӧ культур вержылан шотлалтеш. Тушто кид пашалан мастар, чолга да шке калыкшын тӱвыражым, йӱлажым арален кодышо да тукым гыч тукымыш шуйышо калык ила. Выставкым ончаш мийымеке, тидым кажныже шке ужын кертеш. Тушто сылне марий тӱран тувыр-шовыр, шовыч, ӱяҥге воштыр гыч тодын ыштыме тӱрлӧ арвер да Унчо кундем денак кылдалтше сувенир сату да молат улыт.
Выставкым почмаш чылт пайрем семын эртыш. «Морко кундем» ансамбль баяным шоктымо, тӱмырым пералтыме почеш икмыняр йӱк дене ятыр мурым мастарын йоҥгалтарыш, а теве изи ӱдыр Карина Бушкова (Морко 6-шо №-ан кыдалаш школ) Морко нерген почеламутым моткоч сылнын лудо. «Рвезылык» ансамбльын ӱдыр-рвезыже-влакат чапле куштымаш дене кумылым нӧлтышт.
Выставкыш толшо-влак кажныжым шокшо кидсовыш дене вашлийыч. Нунын коклаште тӱвыра, печать да калык-влакын пашашт шотышто министр К.Иванов, молодёжь политике, спорт да туризм министр, Морко районын кураторжо Л.Батюкова, Кугыжаныш погын председательын алмаштышыже А.Иванов, Морко администраций вуйлатыше А.Голубков, Унчо администраций вуйлатыше И.Евсеев, В.Васильев лӱмеш Йылмым, сылнымутым да историйым шымлыше марий институтын директоржо, Йошкар-Оласе Морко калыкын вашполыш ушемжым вуйлатыше Е.Кузьмин да молат лийыныт.
А.Байкова
М.Скобелевын фотожо.
