Илыме йӧным саемдат
Медведво районысо эше кум самырык ешлан илыме верым чоҥаш але налаш сертификатым кучыктымо.
Самырык еш-влаклан илыме верым саемдаш полшымо федерал целевой программын ныл ий пашам ыштымыж жапыште районышто чылаже витле утла сертификатым кучыктымо. Тыге федерал, республик да муниципал бюджетла гыч нунылан 13 миллион утла теҥгем тӱлымӧ. А шукерте огыл пиалан-влак радамыш эше «Семёновский» племзавод ЗАО-н механикше В.Гайнуллин, фермер озанлыкын трактористше О.Рыбаков да «Тепличный» ОАО-н Непот фермыжым вуйлатыше Н.Иванов ушненыт. Нуно льготан ак дене мланде участкым налыныт да тушто пӧртым чоҥат. Ынде кажне ешлан пуымо 857 тӱжем наре теҥге окса оралтым тӱрыс чоҥен шукташ полшышаш.
Теният чоҥат
Марий Турек районысо Мариец кундемыште пытартыш жапыште ятыр сай вашталтыш лийын.
Марий Элыштына тӱшкан пайдаланыме автомашина корным ачалыме да уэмдыме программе дене келшышын, район админстраций Ведерники ялыш шуйналтше кок километр кужытан корнылан проект да смете документацийым ямдылен. Тудым тений илышыш шыҥдараш тӱҥалыт. Тидымат каласыман: ты корно эше Шишинер ял гочат шуйна. А лишыл жапыште Татарстан чек деке лукшо корныланат проектым ышташ палемдыме.
Верысе калыкын тӱҥалтышыжлан полышым пуымо программылан эҥертен, ты кундемыштак татар тӱвыра пӧртын леведышыжым ачалыме, Шора ялыште спортплощадкым чоҥымо, кӱварым олмыктымо. Мариец посёлкысо Зелёный, 1-ая Набережная уремлаште да Дружино ялыште корным ыштыме, тыгыде кӱм шарыме.
Шке кӱшеш вияҥыт
Кужэҥер районысо тӱшка озанлык-влак кодшо ийын сатум шукырак ямдылыме пашам ворандарен колташ 42,4 миллион теҥге инвестицийым пыштеныт.
Шке окса дене кум миллион утла теҥгеаш техникым да оборудованийым налыныт. «Тумьюмучаш» ден «Куженерский» ООО-влак пырчым эрыктен-коштымо сушилкым ачалаш 6,2 миллион чоло теҥгем кучылтыныт. Тыштак арочный кум складым чоҥеныт, тоштыжын леведышыжым ачаленыт. Тылеч посна «Куженерский» озанлыкыште ушкал ашныме фермым тӱрыс олмыктымо, «Маяк» агрофирмыште пырчым аралаш, эрыкташ келыштарыме леведышан идымым ыштыме. «Росагролизингын» полшымыж дене 12 миллион теҥгеаш пырчым погымо кум комбайным налме. А чумыржо 16,1 миллион теҥгеаш техникым уэмдыме.
Шернур районын кечыже
2017 ий 15 апрельыште Йошкар Олаште Ленин площадьыште эртаралтшаш ялозанлык ярмиҥга тиде районын кечыжлан пӧлеклалтеш. Тыгодым муниципал образований гыч толшо перерабатыватлыше предприятий, фермер ден шке озанлык-влак шке сатуштым ужалаш, а творческий коллектив-шамыч мастарлыкышт дене палдараш тӱҥалыт.
Район-влакын кечыштым эртарыме поро йӱла умбакыже шуйна. А 1 апрельыште эртарыме ярмиҥгаште Марий Эл, Татарстан республикла, Киров ден Ростов областьла, Пермь край гыч ялозанлык сатум ямдылыше 171 участник шке сатужым темлен. Йошкар-Олаште илыше да олан унаже-влаклан ятыр тӱрлӧ свежа кочкышым ужалыме деч посна мыскараче-влак воштылтыш кече лӱмеш йоча ден кугыеҥ-влаклан тӱрлӧ конкурсым эртареныт. Муро да куштымаш программе кумылым нӧлталын.
