26 апрельыште Марий Элыште туныктышо-влаклан профессионал мастарлыкышт дене кылдалтше «Марий Эл Республикын идалыкын туныктышыжо — 2019», «Марий Эл Республикын идалыкын воспитательже — 2019», «Марий йылмым эн сайын туныктышо — 2019», «Шӱмем йоча-влаклан пуэм — 2019» республик кӱкшытан конкурс-влак мучашлалтыныт.
Тений чумыр налмаште 45 участник лийын. Конкурс-влакын очный этапышт 23 апрельыште почылтын. Кум кечыште конкурсант-влак мастер-классым, методический семинарым, почмо урокым, педагогический мероприятийым ончыктеныт, тыгак образовательный проектышт да кредошт дене палдареныт.
Ты гана профессионал мастарлык конкурс-влак Медведево районысо образовательный организацийлаште эртеныт – йӱла почеш тыгак лийшаш. Вет «Марий Эл Республикын идалыкын туныктышыжо-2018» лӱмым лач ты кундемын туныктышыжо – Медведевысе 2-шо №-ан кыдалаш школышто тӱҥалтыш класслам туныктышо Татьяна Михайловна Анисимова – сеҥен налын да Марий Элын чапшым «Российын идалыкын туныктышыжо-2018» всероссийский конкурсышто арален.
Конкурсын пытартыш кечынже ик эн виян педагог да воспитатель-влак кокла гыч эн виянже шкеныштым тергеныт: «Образований айдеме капиталым формироватлыше фактор семын» теме дене мутланеныт, каҥашеныт. Ты кечынак Медведево посёлкысо культур пӧртыштӧ сеҥыше-влакым увертареныт да нуным саламленыт. Марий Эл образований да науко министр Н.Адамова кажныштлан поро мутым ойлен да эшеат вияҥаш тыланен. Теве нунын лӱмышт:
«Марий Эл Республикын идалыкын туныктышыжо – 2019» –
Советский район Вечын кыдалаш школышто биологийым туныктышо Людмила Витальевна Кукарева.
«Марий Эл Республикын идалыкын воспитательже-2019» –
Медведевысе 5-ше №-ан «Шӧртньӧ кол» йочасадын воспитательже Елена Александровна Апостолова.
«Марий йылмым эн сайын туныктышо – 2019» – Волжский район Карай кыдалаш школын туныктышыжо Валентина Валериановна Емельянова.
«Шӱмем йоча-влаклан пуэм-2019» – Звенигово район Красногорскысо усталык пӧртын ешартыш образованийым пуышо педагогшо Виктория Вячеславовна Ибрагимова.
Г.Кожевникова.
Снимкыште: Учитель года – «Идалыкын туныктышыжо-2019» Советский район Вечын школын туныктышыжо Л.Кукарева;
Емельянова «Марий йылмым эн сайын туныктышо – 2019» лӱмым сеҥен налше, Волжский район Карай школын туныктышыжо В.Емельянова.
Авторын фотожо.
