Марий Элыште шошо ага паша тӱҥалын.
Тенийысе шошо агашке ончычсо ийла дене таҥастарымаште ятырлан ончычрак ушнымо. Кеч лум шуко лийын, тудо пасула гыч писын каен пытен. Тидыже нур пашам тӱҥалаш йӧным пуэн. Теве У Торъял районысо «Первый май» колхозышто пасушко 18 апрельыштак лектыныт. Варажымат пашашт ушнен толын. Ялозанлык да продовольствий министерствын оперативный уверже почеш, тиде озанлыкыште 24 майлан 1483 гектарыште кокияш озымлан да шукияш шудылан ешартыш кочкышым пуымо, 1820 гектар нурышто вӱдыжгым кучымо.
Республикысе чыла гаяк район кушкыллан ешартыш кочкышым пуаш, мландым тырмалаш лектын. Чылаже 4,3 тӱжем гектарыште минеральный ӱяҥдышым шавыме, 7,9 тӱжем гектарыште тырмалыме. Таҥастарена: ӱмаште тиде кечылан 378 гектарыште ешартыш кочкышым пуымо улмаш.
Тений икияшым чылаже 130 тӱжем гектарыш ӱдыман. Медведево районышто урлыкашым эн ончыч вераҥдаш лектыныт, 123 гектарыште ӱденыт. Тыгак Кужэҥер районышто 12 гектарыш вераҥденыт.
В.Смоленцев.
