СОЦИАЛЬНЫЙ ИЛЫШ

Олмыктымым контрольышто кучаш тӱналыт

ОНФ-ын региональный отделенийжын еҥже-шамычын полшымыштлан кӧра Йошкар-Оласе ик виктарыше компаний тений шошо-кеҥеж жапыште Данилов уремысе 71-ше №-ан чот тоштемше пӧрт леведышым олмыктымо да вӱд йогымо системым тӱрыс шотыш кондымо йодышым планышкыже пуртен.

Региональный отделенийыш лекше пачер оза-влак 2012 ий годсек пӧрт леведышыштым олмыктыктен огыт керт. Илыме верыш вӱдын тувраш гоч пырдыжыш витен пурымыж нерген ик гана огыл актым возымо. Капитальный ремонтым ышташ комиссий пунчалын гынат, кӱштымым жап дене шуктымо огыл.

Пӧртым 37 ий жапыште ик гана олмыктымо  огыл. Тыште коштын кертдыме пенсионер-шамыч илат. Виктарыше компаний нунын темлымыштым шотыш ок нал. А илыме верым шотышто кучымылан да пӧртым ачалымылан, ремонтым ыштымылан оксам жапше ден тӱлен илена, – ойлат пачер оза-влак.

Специалист-шамычын палемдымышт почеш, виктарыше компаний пӧрт леведыш гыч вӱд йогымым чараш нимогай аралтышым ыштен огыл. Договор дене келшышын, ситыдымашым кораҥдаш вашкен огыл.

Тидлан кӧра виктарыше компаний вуйлатышылан административный правам пудыртымылан протоколым возымо да штрафым тӱлаш ыштыме.

Р.Чепакова.       

Опубликовать в Одноклассники

Добавить комментарий