14 апрельыште Советский районысо «Звезда» ФОК-што район кӱкшытан «Воин» спартакиаде лийын. Тыгай сынан таҥасымаш 9-ше гана эртаралтын. Тушко боевой действийын ветеранже-влак ушненыт. Таҥасымаште Кужмара, Алексеевский, У Торъял, Советский гыч команде-влак лийыныт.
Патыр-влак шахмат дене модмаште, автоматым рончен погымаште, ӱстембал теннисыште, дартсыште, лӱйылтмаште, кирам нӧлтымаште таҥасеныт. Оҥай, тыште кажныже спортын тӱрлӧ видыштыже вий-куатшым терген кертын. Эсогыл спартакиадым иктешлыме деч варат спортсмен-шамыч я шахмат дене модыныт, я дартсыште тура улмыштым тергеныт.
Ӱстембал теннис ден кирам нӧлтымаште Александр Кугергин икымше верыш лектын. Александр 24 килограмм нелытан кирам пел кид дене 122 гана (рывок) нӧлталын. Автоматым рончен погымаште Илья Кожевников ден Владислав Кельбедин ончылно лийыныт. Лӱйылтмаште Александр Сергеев ойыртемалтын. Дартсыште Владимир Орехов икымше верым налын гын, шахмат дене модмаште – Владимир Якимов.
– Тыгай таҥасымаш икмыняр ий ял шотан илемлаште эртаралтын. Теве ынде – чапле «Звезда» ФОК-ышто. Участник-влак чылан тыршеныт. Тыге таза илыш-йӱлам кучена, самырык тукымлан пример улына, шонем, – манеш спартакиадын организаторжо Владислав Шабалин.
Таҥасымаште икымше верыш Советский посёлкын, кокымшыш Кужмара ял шотан илемын, кумшыш Алексеевский посёлкын командышт лектыныт.
Е.ЭШКИНИНА.
