Мурызо, артист-влак мемнан илышнам сылне муро, оҥай образ да роль дене куандарат. Лач нуно мыняр-гынат илышнам веселаракым, оҥайракым ышташ тыршат. Такшым нунынат илышышт эреж годым ӱй да мӱй огыл, шонем, вет пашадарышт утыждене кугужак огыл. Сандене тӱрлӧ вере пашам ыштат, тӱрлӧ йӧным кычалыт. Марий мурызо, артист-влак сцене деч посна эше кушто тыршат?
Татьяна Умурбаева:
— Марий Элысе кугыжаныш ветеринарий службын пресс-секретарьжылан ыштем. Жап лийме семын репертуарым у муро дене пойдараш тыршем. Муро мыланем илаш, кумылым нӧлташ, тӱрлӧ нелылыкым сеҥаш полша.
Лилия Петухова:
— Кокымшо йоча дене мӧҥгыштӧ улам. Тудлан шыжым кум ий теммеке, ончычсо паша верышкак, Моркысо «Жилкомсервис» ООО-ш, лектам. Юрисконсульт да кадр шотышто инспектор пашам шуктем.
Аделина Батаева:
— Национальный президент школышто педагог-организаторлан ыштем, тыгак МарГУ-со национальный тӱвыра да тӱвыра кокласе коммуникаций институтышто очно тунемам. Сценыш лекташ жапым муашак тыршем. Кызыт, мутлан, у муро-влакым ямдылем. Вашке нуным калык ончыко лукташ шонем.
Сергей Попов:
— «Марийскавтодорышто» ынде 20 ий электрогазосварщиклан ыштем. Икымше кече гычак «Марий Памаш» ансамбльыште, а вараракше «Каче-влак» группын вуйлатышыже да солистше улмем паленыт. Чон йодмо пашам шукташ нимо чаракым ыштышаш огыл. Мыйынат тугак, пашаштат чылан умылат, икте-весылан эреак полшен шогат.
А.БАЙКОВА.
