МЕР ИЛЫШ ДА ЙӰЛА

Шошымсо марий форум

25-26 апрельыште республикысе Мер-политике рӱдерыште «Марий форум -2019: шошымсо сессий» эрта.

 Тудо Мер Каҥашын пленумжо дене почылтеш. Каҥашышашлык тӱҥ йодыш Марий Элын 100 ияш лӱмгечыжым палемдаш ямдылалтме да тудым эртарен колтымо дене кылдалтын. XI Марий погынлан ямдылалтме паша нергенат посна ойлышаш улыт. Тений лийшашлык республик кӱкшытан Пеледыш пайремланат верым ойрат. Тыгак  Мер Каҥашын исполкожын составышкыже вашталтышым пуртышаш, ревизионный комиссийлан семинарым эртарышаш улыт.

Вес кече «Талешке сорта» акций дене тӱҥалеш. Чылан С.Г.Чавайн лӱмеш памятник воктене 7 шагатлан погынат. Тушеч олаште марий талешке-влаклан  вераҥдыме шарныктышла деке пеледышым пышташ да вуйым саваш тарванат.

Тиде кечын Мер-политике рӱдерыште 9 шагатлан «Марий Элыште марий калыкын ойыртемалтше сынжым арален кодымо нерген» конференций, 13 шагатлан В.М.Васильев лӱмеш Йылмым, историйым, сылнымутым научно- шымлыше марий институтышто «Ӱпӧ марий лудмаш» почылтыт.

17 шагатыште форумыш толшо-влакым оҥай кас вуча. Чарла кремльыште «кава йымалсе театр» почылтеш. Марий Самырык театрын артистше-влак З.Долгован «Немыч вате» пьесыж почеш шындыме постановкым ончыктат.

 С.Носова.

Опубликовать в Одноклассники

Добавить комментарий