15 апрельыште Российын эше 20 регионжым федеральный телеканал-влакын аналоговый вещанийышт гыч цифровойыш кусарыме. Кокымшо толкыныш Москва ден Москва область, Мордовий, Калмыкий, Карачаево-Черкессий, Кабардино-Балкарий, Удмуртий, Чуваший, Ставропольский край, Ямал-Ненец автономный округ, Амур, Иваново, Кемерово, Киров, Кострома, Курган, Липецк, Новгород, Сахалин, Тюмень областьла пуреныт.
Тений аналоговый гыч цифровой телевещанийыш Российын 85 регионжым кусараш паледыме. Ты шотышто кодшо ий декабрьыште Тверь область, манмыла, пионер лие. Икымше толкын 11 февральыште стартым нале да шым регионым авалтыш.
Цифровой телевещанийыш куснымо дене Российыште илыше-влак тымарте тӱлыман пакет дене гына темлыме чапле качестван ятыр каналым чылт яра ончаш тӱҥалыт. Икымше мультиплексыш Икымше канал, «Россия 1», «Матч ТВ», НТВ, «Петербург-5 канал», «Культура», «Россия 24», «Карусель», ОТР, «ТВ Центр» пурат гын, кокымшыш – «Рен ТВ», «Спас», СТС, «Домашний», «Пятница», «Звезда», «Мир», ТНТ, «Муз-ТВ».
Элнан кодшо 57 регионжым цифровой вещанийыш кокымшо толкын дене 3 июньышто кусарат. Тышкыже Санкт-Петербург, ХМАО, Севастополь, Крым, Приморье, Чукотка, Камчатка, Йӱдвел Осетий – Аланий дене пырля Марий Элат логалеш.
…Аналоговый гыч цифровой телевещанийыш кусарыме годым регионласе калыклан ик арня жапыште 15 минуташ информационный ролик темлалтеш. Тушто «цифрыш» куснаш кӱлшӧ лачшымак могай оборудованийым налаш, тудым да антенным телевизорыш кузе ушаш кӱлмӧ нерген ойлалтеш. Тылеч посна цифровой вещанийыш куснымо шотышто шокшо линий пашам ышта, тушто калыкын йодышыжлан 1400 оператор вашешта. Нунак нужнанрак илыше-влаклан адресный полышым пуымо нерген радамлын умылтарат. Цифровой телевещанийыш куснымо годым иктаж нелылык, йодыш лектыт гын, лӱмын туныктымо волонтёр-влак полшен кертыт.
«Аналоговый передатчикым йӧртымӧ годым Россий Федерацийын чыла регионыштыжо чрезвычайный ситуаций нерген увер системым цифровой формат дене шыҥдарат. Тымарте тиде изинрак пуалтын», – манеш РТРС-ым вуйлатыше Андрей Романченко.
М.ИВАНОВА
