16 апрельыште Марий Элым вуйлатыше Александр Евстифеев Москваште организационный комитетын заседанийыштыже участвоватлен. Совещанийым Россий Федераций правительстве председательын алмаштышыже Виталий Муткон вӱден. Тушто Марий Элын 100 ияш юбилейжылан ямдылалтме йодышым онченыт.
Совещанийым почмыж годым Виталий Мутко Марий Элын 100 ияш лӱмгечыжлан ямдылалтме шотышто оргкомитетын 2018 ий 17 октябрьыште эртыше заседанийжым ушештарен да тыге палемден: совещанийын итогшо почеш пуымо чыла порученийым республике шуктен.
100 ияш юбилей — пеш кӱлешан дате, сандене республикым пайремлан ямдылен шуктышашлан кажне кечым пайдалын кучылтман, каласен Марий Элым вуйлатыше. Тидын годымак, Александр Евстифеевын мутшо почеш, республикын правительствыже шке ончыланже утларак кугу задачым шында. Тиде – республикыште кажне еҥлан илашыже да пашам ышташыже йӧнан лийже манын, илышын чыла сферыжым ямдылен шуктымаш.
Культур, печать да национальность паша шотышто министр Константин Иванов пайремлан ямдылалтме кышкарыште эртарыме да ончыкыжо эртараш палемдыме мероприятий-влак нерген радамле докладым ыштен. Тидын шотыштак тудо «Йошкар-Ола театральный» да «Майатул» фестиваль, республике мучко тӱжвалне модын ончыктышаш постановко-влак да моло проект нерген каласкален.
Совещанийыште тазалыкым аралыме объект-влак нергенат мут лектын. Марий Элым вуйлатыше Йошкар-Олаште перинатальный рўдерым чоҥаш да Козьмодемьянск олаште районный больницым ыштен шукташ кўлеш манын палемден.
Тудо оргкомитет член-влаклан образовательный учреждений-влакым чулымын чоҥымо нерген увертарен – кодшо ийыште гына 5 йочасадым почмо манын. Республикым вуйлатыше тыгак Марий Элысе калык-влакын келшымаш пєртыштым почаш шонымо нерген ойлен.
Совещанийыште оргкомитет член-влак Йошкар-Ола аэропортым пашаш колтымо йодышымат каҥашеныт. Виталий Мутко тений июльышто самолет-влак уэш чоҥештылаш тӱҥалыт манын палемден.
Заседанийыште еҥ-влакым аварийный пєртла гыч вес верыш кусарыме, оласе средам саемдаш да региональный корнылам шотыш кондаш федеральный бюджет гыч ойыралтше оксам шукемден кертме йӧным каҥашеныт.
Нине йодыш юбилейлан ямдылалтмын кєра веле огыл кўлешан улыт, республикым умбакыже вияҥдыман, каласен Виталий Мутко.
Марий Элым вуйлатыше вашлиймаш пытыме деч ончыч национальный проект-влакым шуктымаш ден республикын юбилейжылан ямдылалтме паша икте-весышт дене пеш чак кылдалтыныт манын палемден да пайремлан ямдылалтмаште участвоватлымыжлан Россий Федераций правительстве председательын алмаштышыже Виталий Муткон таум каласен.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
Д. Речкинын фотожо.
