Российыште илышыш шыҥдараш палемдыме нацпроект-влак дене келшышын, Марий Элыштат шуко сай вашталтыш лийшаш.
Мутлан, пӱртӱс поянлык да экологий сферым налына. Тудлан Пӱртӱс поянлык, экологий да йырым-йырысе средам аралыме шотышто министерстве вуйын шога. «Экологий» нацпроект дене келшышын, регионышто пеҥгыде коммунал торым кучылтмо шотышто комплексный системе ышталтын. Тыгак шӱкшакым сортироватлыше ныл комплексым чоҥат. Тидлан 437,8 миллион тенге ойыралтын. Тений гына 14,9 миллион теҥгем кучылтшаш улыт. Вес проект «Ару эл» маналтеш. Тудын почеш эксплуатаций гыч лекше полигон-влакым уэмдаш тӱҥалыт. Тидлан 101,1 миллион теҥгем ойырат. Пашам 2020 ийыште тӱҥалыт.
Кумшо проект регионышто ойыртемалтше вӱд объект-влакым арален кодымашке виктаралтын. Нуным аралаш, тӱзаташ, серыштым эрыкташ тӱҥалыт. Ты пашалан тыгак вес ийын пижыт да тидлан 63 миллион теҥгем ойырат.
Нылымше проект республикыште чодырам аралыме пашалан пӧлеклалтеш. Ты сферысе озанлыкыште пожар ваштареш кучедалше специализироватлыме учреждений-влакым спецтехнике дене пойдарат, чодыра кумдыкым кугемдат да ты пашан качаствыжым да лектышыжым саемдат. Тидлан федерал бюджет гыч 170,4 миллион тенге ойыралтшаш. Тачысе кечылан кугыжаныш контракт почеш 32,9 миллион теҥгелан пожарым йӧртымӧ да чодыра озанлык техникым налме.
Тыгак 2020-2022 ийлан Звенигово олаште Юлын сержым пеҥгыдемдыме шотышто проект шукталтшаш. Тӱрыс паша 345,6 миллион теҥгеш шуэш.
«Экологий» нацпроектым илышыш шыҥдарыме нерген эртыше кечылаште РФ Пӱртус поянлык да экологий министерствын коллегийжын заседанийыштыже мутланеныт. Тудым ведомство вуйлатыше Д.Кобылкин эртарен. Тушко Марий Эл вуйлатыше А.Евстифеев миен коштын.
С.Носова.
