«15 апрельыште Волжск оласе Герой-влакын аллейышт гыч Россий Герой Валерий Ивановын бюстшо йомын…»
Тиде шучко увер Одноклассники, WhatsApp, ВКонтакте да моло социальный сетьлаште пеш писын шарлыш да калыкын каҥашымашкыже лекте. Икте «Тӱняште мо ышталтмылан ӧрат веле…» манеш, весе «Кӧлан мешаен?» йодеш, кумшо «Узо каза, урод-шамыч!» кычкыра, нылымше «Ала олмыкташ налыныт» лыпландара…» Эсогыл «Волжская правда» газет сайтышкыже кокытеланымашым лукшо уверым шынден. Мыят, сулыкыш пурен, ала-момат шонаш тӱҥальым.
Мужедын, вуйым аҥыртылаш огыл манын, Волжск олан администрацийышкыже йыҥгыртышым.
– Бюстым нигӧ шолыштын огыл, тудым йоча художественный школыш реставрироватлаш пуымо. Сеҥымаш кече марте тӧрлатен шуктышаш улыт, да вара угыч верышкыжат пӧртылтена, – тургыжландарыше йодышемлан тыматлын вашештыш Волжск ола администрацийым вуйлатышын алмаштышыже, аппаратым вуйлатыше Дмитрий Анисимов.
Теве тыге. Манеш-манешын капка меҥгыже чынжымак шӧрын каен улмаш…
М.ИВАНОВА
Снимкыште: ида лӱд, бюстым нигӧ шолыштын огыл.
Фотом ВКонтакте социальный сетьын «Волжск. Я в курсе!» сообществыжын пырдыжше гыч налме.
