КИДМАСТАР ЯЛ ИЛЫШ

МАСТАР ЕҤЫМ муаш неле – тудо эре пашаште

Вячеслав Григорьевич Беляев Советский район Алексеевский посёлкысо Сеҥымаш уремыште чатка пӧртым чоҥен (снимкыште). Посёлкышто тиде урем улан шотлалтеш. Пӧртшат кызытсе жаплан келшыше чоҥымо материал дене ыштыме. Беляевмыт ешын кок пачашан суртышт умбачынак палдырна. Пӧртыш канде тӱсан поликарбонат дене ыштыме пӧртӧнчыл “пурта”. Сурт пеленак мотор гараж, монча, пакчаште кок теплицым ыштыме. Шижалтеш, озан кид-йолжо чоҥымо пашалан пеш келшен толеш. Садлан огыл мо верысе калык тудым уста кидмастар семын пала.

Шке жапыштыже Вячеслав Григорьевич “Алексеевский” госплемзаводышто трактористлан тыршен. Варажым госплемзавод банкрот радамыш логалын. Тыге тудо пашам Йошкар-Оласе, Москосо тўрлє организацийыште трактористлан тыршен. Но ӧрдыж кундемыште пашаш кошташ – манаш веле. Йолташыже Николай Алексеевич Яровиков тудым чоҥымашке ӱжын. Тыге Вячеслав Григорьевич у пашалан тунемын. ЙошкарОлаште пӧрткӧргыштӧ отделкым ышташ, плиткым опташ, гипсокартон дене туврашым ышташ тӱҥалын.

Ондак ты оралте пєрт олмышто В.Беляевын аважын пытыше тошто пу пєртшӧ лийын. Вячеслав Григорьевич ешыж дене кум ий жапыште 120 квадратный метр кумдыкан суртым чоҥен. Мийымына годым оза йолташыже Н.Яровиков дене Йошкар-Олаш пачерыште ремонтым ышташ каен ыле, сандене мыланна пӧртым, кудывечым, мончам да моло оралтым пелашыже ончыктыш. Кудывечыште, пакчаште лум шулен пытен огыл гынат, чыла вере шижалтеш – озавлак оралтым чаткан кучат. Кудывечышт пеш ару. Урем гыч мотор изигапкам, тӱжвачын пєрт пырдыжым нарынче кермыч дене оптымо. Урем гыч тӱҥалын пӧртӧнчыл марте тротуарым чаткан оптымо. Калитке ден саварым, леведышым канде тӱсан профнастил дене ыштыме.

Мончаончылно каныме верым келыштарыме. Тушто Шернур гыч толшо кидмастар-влак мангалым, монча коҥгам чаткан оптен коденыт. Монча ончылнак йоча-влаклан спорт ӱзгарым вераҥдыме.

Пӧртыш пурышна. Суртоза зал ден кухньо коклам пеш оҥай форман гипсокартон дене кыдежлен. Прихожийыште, кухньышто шокшо кӱварым ыштен. Пӧлемысе туврашым гипсокартон дене ыштыме. Тушто шкешотан светильникым сакыме. Кокымшо пачашыш малыме пӧлемыш мотор тошкалтышым келыштарыме. Тыгай суртым ужмеке да тудым могай чоҥымо материал гыч ыштыме пален налмеке, вигак шоналтет: суртын ӱмыржє кужу лийшаш.

М. Скобелев

Авторын фотожо.

Опубликовать в Одноклассники

Добавить комментарий