«Лӱдыкшыдымӧ да качестван корно» национальный проектым илышыш шыҥдараш республиклан 17 миллиард теҥге оксам ойырат.
Ик тӱҥ верыште
Марий Элын Антикризис рӱдерыштыже пресс-конференций эртен. Тушто 2019 ийысе сезонлан корным чоҥымо план, элнан президентше Владимир Путинын темлыме нацпроектым илышыш шыҥдарыме нерген мутланыме.
Журналист-влак дене вашлиймашке правительстве председательын икымше алмаштышыжын пашажым жаплан шуктышо А.Сальников, «Волго-Вятскуправтодор» предприятийын начальникше И.Мингазов, «Марийскавтодор» компанийын директоржо А.Аверин, «Йошкар-Ола» ола округын администрацийжым вуйлатыше Е.Маслов да молат толыныт.
Пресс-конференцийым почшыжла, А.Сальников Марий Элыште ик эн пӱсӧ йодышым решатлымаште правительствын пашаж дене палдарен. Социологический йодыштмаш почеш таче ялыште начар корно йодыш ик эн тургыжландарышылан шотлалтеш.
— Куд ий жапыште мемнан республиклан нацпроект почеш 17 миллиард теҥге ойыралтеш. Тиде окса республик значениян, тыгак Йошкар-Оласе корнылам ышташ да ачалаш кучылталтшаш. Тыгай окса нерген ме шоналтенат кертын огынал, — каласен Александр Анатольевич.
Йошкар-Ола деч посна Медведево, Оршанке ден Советский районласе корнат олмыкталтшаш улыт. Молан тыгай кугу окса ойыралтме нерген мут лектеш? Таҥастарена: республикын шкенжын корно фондшо улыжат кок миллиард теҥгешке гына шуэш. Тышечынжат пелыже лум ден ийым, шўкым кораҥдаш, корно знакым шогалташ да молыланат кучылталтеш.
— Ме калыкын «Кунам мемнан дене корным ачалат? манын йодмыжлан але марте вашештен кертын огынал. Фондым кок пачаш кугемдымылан кєра тений автокорным ятырлан шукырак ачалаш палемден кертынна, — каласен А.Сальников.
В.Путинын указше почеш Российыште 12 национальный проект илышыш шыҥдаралтеш. Ты шотышто Марий Элыште чылаже 53 региональный проектым палемдыме. Тудын кугытшо лишыл куд ийлан 51 миллиард теҥгешке шуэш.
Федерал-влак мом сӧрат?
Марий Эл Республик гоч кок федерал автокорно эрта: Р-176 «Вятка» ден А-295 «Йошкар-Ола-Зеленодольск». Тудын кужытшо – 229 километр. Тений утларакше «Вятка» трассыште корным тєрлат. Медведево, Оршанке районлаште да Йошкар-Ола йыр 16 километр корным капитально ачалат. Оршанке районышто тыгак Марково ден Ивановка ялласе остановко воктене йолешке-влаклан тротуарым ыштат. Тыгак Медведево районышто да Йошкар-Ола йыр кандаш километр корным ачалат.
Корнышто коштмо лӱдыкшым кораҥдышашлан Йошкар-Ола-Зеленодольск федеральный корнышто 1,3 километр кужыт кӱртньӧ пече авыртышым шогалтат, Куяр посёлко лишне светофорым вераҥдат, 5 вере йолешке-влакын кугорным вончымо верым да автобус остановкым электротул дене волгалтарат. Тылеч посна йолешке-влаклан кнопко дене чӱктымӧ 4 светофорым вераҥдат. Тыгак корнышто коштмо правилым пудыртымым эскераш 16 фото-видеофиксаций камерым вераҥдат.
Кок пачаш шукырак ойырымо
Марий Элыште нацпроект кум йогын дене шукталташ тӱҥалеш: «Корно сеть», «Корно озанлыкым вияҥдыме общественый мера-влак», «Корнышто коштмо лўдыкшыдымылык». Регионышто чылаже 119 километр кужыт региональный ден верысе автокорнылам шотыш кондат. Тений корно пашалан чылаже 2 миллиард теҥге ойыралтеш, тышечын 1,6 миллиардшым федеральный бюджет ойыра. Ачалыме планым ыштыме годым эн ончычак общественный транспорт маршрут-влак эртымым да поснак чот олмыкташ кӱлмым шотыш налме. Йошкар-Олаште Западный, Карл Маркс, Первомайский уремлаште да Ленинский проспектлаште 10 километр утла корным ачалат. Тылеч посна Медведево, Советский ден Оршанка посёлкыласе шым уремым шотыш кондат.
Региональный трассылаште кугу паша шукталтшаш: тыште 100 утла километр трассым норматив состоянийыш кондат. Нацпроект дене келшышын, 2,1 километрым пужен ыштат, 98 километрым олмыктат, тышечын 2,3 километржым капитально ачалат. «Корно сеть» региональный проект почеш 2024 ий марте 1070 километр региональный трассе ачалалтшаш, тыгак 200 утла километр – Йошкар-Ола ола агломерацийыште.
Нацпроектын ик тӱҥ задачыже – эн сай технологийым да материалым кучылташ. Тыге у тип асфальтобетон вартышым кучылташ палемдалтеш. Тыгак асфальтобетон лончым оптымо годым йӱштӧ регенераций технологийым шыҥдарат.
В.Смоленцев
Снимкыште: пресс-конференций годым.
Авторын фотожо.
