12 апрельыште Марий Элыш Москва гыч Кугыжаныш Думын депутатше ден РФ Федеральный Погынымашын Федераций Советшын еҥже-влак паша визит дене толыныт. Нуно национальный проект-влакым илышыш шыҥдарыме кышкарыште чоҥымо объект-влакым онченыт, Россий президент В.Путинын майысе указыштыже палемдыме задаче-влак шотышто лекше йодыш-шамычым каҥашеныт.
Делегацийым республикым вуйлатыше Александр Евстифеевын лӱмжӧ дене Марий Эл правительстве председательын икымше алмаштышыже Сергей Сметанин вашлийын. Тудо паша лектышым тыланен, тыгак регион, сеҥымаш да сай тенденций-влак дене кӱчыкын палдарен, национальный проект-шамычын республикысе икмыняр проблемым решатлаш полшымышт нерген ойлен.
«Нине цельлан 55 миллиард утла теҥгем ойырымо. Тидыже Марий Эллан – кугу цифр», – манын С.Сметанин.
Марий Эл толерантность да конфессий-влак коклаште кылым муын моштымыж дене эреак ойыртемалтын, палемден правительстве председательын икымше алмаштышыже. Шке шомакшым тудо 2017 ийыште президент В.Путинын Марий Элыш толын коштмыжо да тиде кышкарыште республикыштына Наций-влак кокласе кыл шотышто советым эртарыме дене пеҥгыдемден.
Делегаций Марий Элыш лушкыдо верлам кычалаш, кучемын пашажым шылталаш огыл толын, палемден Федераций Советын калык-влак кокласе паша шотышто комитетшын председательже К.Косачев. Тудын мутшо почеш, регионыштына пырля ыштен кертме пашам муаш да тидлан федеральный кӱкшыт гыч полшаш кӱлешан, вет национальный проект-влакым палемдыме жаплан тичмашнек шуктыман.
Федераций Советын экономический политике шотышто комитетшын еҥже В.Кравченко таче Российысе чыла регионын нацпроект-влакым илышыш пуртымо тӱҥалтыш йыжыҥыште улмыштым, сандене визитын пашам виктарен колтымо йодыш дене чак кылдалтмыжым палемден.
Совещанийым мучашлыме годым С.Сметанин регионын правительствыже нацпроект дене кылдалтше чыла пашам иквереш да пайдалын шукташ, темлымаш-влакым шотыш налаш ямде улмыж нерген ойлен.
Тиде кечын Кугыжаныш Думын депутатше ден Федераций Советын сенаторжо-влак, ныл тӱшкалан шелалтын, Марий Эл правительстве еҥ-влакын кондыштарымышт почеш нацпроект полшымо дене чоҥымо объектлам ончен савырненыт, тымарте ыштыме пашам акленыт, моло йодышымат лончыленыт.
* * *
Кугыжаныш Думын депутатше ден Федераций Советын еҥже-влак Марий Эл правительствын Звенигово олаште аварийный канализаций сетьысе ситыдымаш-влакым кораҥдыме пашам сай велым аклен.
Тидын нерген регионысо журналист-шамычлан Контроль группын координаторжо, «Единый Россий» партийын генеральный советшын еҥже, РФ Федеральный Погынымашын Кугыжаныш Думыжын экономический политике, промышленность, инновационный вияҥмаш да предпринимательстве шотышто комитетшын еҥже Денис Москвин ойлен.
«Звенигово олаште илыше калыкым канализаций сетьым шотыш кондымо йодыш чот тургыжландара. Чынак, тудым жапым шуйкалыде олмыкташ, тиде пашам муниципалитет велым, а тӱҥжӧ – республике велым, эскеренак шогаш кӱлешан. Палем, тиде йодышым Марий Элым вуйлатыше контрольышто куча. Ситыдымашым кораҥдышашлан кызыт 20 миллион теҥгем ойырымо. Палемдыме чыла паша жапыштыже шукталтеш да мемнан партийный организацийна, чыла кӱкшытан кучем тиде йодышым мучаш марте контрольышто кучат манын ӱшанена. Эше ик гана ойлем, пашаче группын шонымыж почеш, кызытсе мера-влак проблемым чактараш ситат», – манын тудо.
* * *
Вес группо Йошкар-Оласе 3-шо да 1-ше №-ан йоча поликлиникылаш, Республикысе перинатальный рӱдерыш, онкологический диспансерыш, Сарын ветеранже-влакын госпитальышкышт миен коштын. Медик-влак нацпроект полшымо дене чоҥымо объектлам, налме оборудованийлам аклыме деч посна тыгак гериатрий, ийгот дене кылдалтше чер деч профилактике йӧн, онкологий, вашкеполыш службын тачысе пашаже, кадр политике нерген радамлын мутланеныт.
М.ИВАНОВА
