Шолыштмаш лийын гын…
Полицийыш шолыштмо нерген йодмашым пуэнам. Вара шолыштшыжо могай эҥгекыш пуртымо росктошым пӧртылтен. Ынде йодмашым мӧҥгеш налын кертам мо?
Н.Завьялов
Советский район.
Йодышлан Медведево районысо прокурорын полышкалышыже С.Г.Захарова вашештен:
— Шолыштмо нерген йодмашым полицийыш пуымо гын, тудым регистрироватлат. РФ Уголовно-процессуальный кодекс дене келшышын,дознаватель, дознаний орган, следователь, следственный орган вуйлатыше, тыгай йодмашым налын, преступлений лийме нерген уверым тергышаш улыт. Закон почеш тыгай преступленийым ыштыме шотышто пунчалым луктын кертыт: уголовный делам тарватыме нерген; следствий кайыме шотышто увертарыме нерген, а посна еҥын титаклымыж почеш уголовный делам тарватыме гын — судыш колтымо нерген.
Гражданин йодмашым полицийыш пуэн гын, тудым огыт пӧртылтӧ. А шолыштмылан кӧра титаклыме еҥ роскотыш пуртымо кугыт оксам пӧртылтымым куштылемдыме обстоятельстве семын гына ончат.
Отпускым пуат?
Йочам эргылыкеш налме гын, декрет отпускым пуат мо?
Е.Михайлова
Йошкар-Ола.
Йодышлан Медведево районысо прокурорын полышкалышыже С.Г.Захарова вашештен:
— РФ Паша кодексын 257 статьяж дене келшышын, эргылыкеш налше пашаеҥ-шамычлан йочам ончаш отпуск пуалтеш. Тудым ачаже але аваже налын кертыт (эргылыкеш пырля налыныт гын). РФ Правительствын пунчалже почеш (11.10.2001) тыгай ача-влаклан отпускым пуат:
— эргылыкеш налме кече деч вара азан шочмо кечыж деч 70 календарный кече эртымеш, кокыт але утларак йочам эргылыкеш налме гын — 110 кече эртымеш.
— йочан кум ийым теммешкыже.
Тыгай отпускым налаш пашаеҥ йодмашым возышаш, эргылыкеш налме шотышто судын пунчалжым (копийым), йочан шочмо кагазшым намийышаш.
Йочам марий ден вате пырля эргылыкеш налыныт гын, эше иктыже шке паша верже гыч тыгай отпускым налдымыже але азам ыштыме дене кылдалтше отпускышто лийдымыж нерген справкым пырля пыштышаш.
Ойпидыш лийшаш…
Мый шкемын суртышто илем. Пеҥгыде коммунал шӱкшакым коҥгаште йӱлалтем але сад-пакчашке урем. Тидын шотыштак рашемдынем: шӱкшакым шупшыктымылан ойпидышым ыштыде лиеш мо?
А.Игнатьев
Оршанке район.
Йодышлан Медведево районысо прокурорын полышкалышыже С.Г.Захарова вашештен:
— «Производство да кучылтмо шӱкшак нерген» федеральный закон дене келшышын, пеҥгыде коммунал шӱкшакын озаже тудым шупшыктымо шотышто услугылан региональный оператор дене ойпидышым ыштышаш.
Тыгай ойпидышым ыштыме деч юридический лица-влак веле отказен кертыт. Но тудын пого радамысе кумдыкшын чекыштыже, кушто пеҥгыде коммунал шӱкшак лектеш, але воктенысе участкын чекыштыже закон дене келшышын ыштыме коммунал шӱкшакым кышкыме вер лийшаш.
Тыгай ойпидыш РФ правительствын пеҥгыдемдыме типовой ойпидыш негызеш ышталеш. Опидыш ыштыше-влак Российысе законодательствын положенийже-влаклан тореш огыл улшо моло ешартышымат пуртен кертыт.
Льгот уло
Мландылан да погылан налогым тӱлымӧ годым пенсионер-шамычлан льготым пуэныт маныт. Чынак мо?
К.Иванов
Кужэҥер район.
Йодышлан Медведево районысо прокурорын кугурак полышкалышыже С.Г.Белова вашештен:
— 2018 ий 30 октябрьыште лекше РФ Налог кодексын 391-ше статьяшкыже вашталтышым пуртеныт. Тудын дене келшышын, физический лицан мландылан да погылан налогым тӱлымыж годым льгот пуалтеш. Вашталтышым пуртымеке, 6 сотко деч шагалрак мландылан налогым тӱлыман огыл. Тиде льготшо дене 2019 ий 1 январь деч вара пенсийыш лекшашлык (но пенсийыш лекме ийготым кугемдымылан кӧра лектын огытыл) еҥ-влак пайдаланен кертыт.
С.Носова ямдылен.
