В.И. Вернадский лӱмеш фонд да Пӱртӱсым аралыме всероссийский обществе «Ужар шошо-2019» экологий акцийым увертареныт.
Тудо самырык тукымым экологийлан шӱмаҥдаш, калыкнам пӱртӱс дене келшен илаш туныкташ, тӱрлӧ организаций ден кугыжаныш кучем орган-влакым йырым-йырысе средам аралыме пашаш ушаш, тидын дене кылдалтше пӱсӧ йодыш-влакым решатлен толаш манын эртаралтеш.
Акцийыш ушнаш шонышо-влак //vesna.vernadsky.ru/регистрация-участников-субботника-з/ сайтште регистрироватлалтшаш улыт. Паша ышталтмеке, отчётым колтыман. 24 май марте отчётым колтен шуктышо-влакым шергакан пӧлек дене палемдат. А эн чолга участник-влакым 5 июньышто, Экологын кечыжым палемдыме торжественный мероприятийыш ӱжыт.
Марий Элын Пӱртӱс понялык, экологий да йырым- йырысе средам аралыме шотышто министерствыжат ты акцийыш ушна. Тидын шотыштак тудо «Мый «Ужар шошо — 2019»акцийын участникше улам» творческий конкурсым увертара. Тудо 20 апрель гыч 1 июнь марте шуйна да кум номинацийыште аклалтеш:
— Ужар шошо — 2019» — объективыште» (акций жапыште ыштыме фотографий-влак;
— «Эн сай видеоролик» (посна мероприятий але участник нерген видеоролик;
— «Ужар строка» (печатный але электрон савыктышлаште ты акций нерген каласкалыше материал-влак).
Конкурсыш ийготым шотыш налде чыла кумылан-влак ушнен кертыт. Ойыртемалтше-влакым тыгак 5 июньышто Москваште палемдаш тӱҥалыт.
С.Носова
