Кужэҥер районышто самырык тукым спортлан кумылан. Поснак ечыгорнышто сай результатым ончыктат. Такшым уло кушко кушкаш, кӧ деч примерым налаш. Ты кундемыште шым спорт мастер! Тиде вид дене таҥасымашыжат чӱчкыдынак эртаралтеш. Мутлан, 1 апрельыште «Спорт мастер-влак» лӱмеш йӱлаш пурышо таҥасымашке ятыр спортсмен чумырген. Тӱрлӧ тӱшкаште эн виянжым палемденыт, Чап грамот ден пӧлекым кучыктеныт.
– Йӱлаш пурышо ты таҥасымаш шуко ечызым чумыра. Теният тыгак ыле. Мутат уке, тургыжланаш, ямдылалташ логалын, но тиде куаным гына конден. Шошо игечат пеш сай ыле. Тидыже участник-влак кумылыштым эшеат нӧлтен. Уна-влаклан концерт сай пӧлек семын лийын, – мане организатор, ече дене тренер В.Еменгулов.
Палемдыман, Коҥганур школын тунемшыже Григорий Полушин (тренерже В.Еменгулов) спорт мастерыш кандидат нормативым шуктен. Йӱлаш пурышо «Весенняя капель» таҥасымаш Чуваш республикыште эртен. 30 километрыште марий рвезе икымше верым налын. А Киров областьыште эртыше «Шижма-2017» марафонышто (25 км, 50 км) Г.Полушин кокымшо лийын. Стартыш тунам 550 участник лектын.
Тылеч ончыч, 28 мартыште, Йошкар-Ола воктенсе «Корта» ече базыште тренер-преподаватель Э.М.Лобановам шарныме лӱмеш ече дене таҥасымаште спортсмен-влак Чуваш Республик, Киров область гычат лийыныт.
Чылан тыршеныт. 2001-2002 ийлаште шочшо-влак коклаште кум километрыште коньки йӧн дене Кужэҥер район гыч Карина Бочарова ший призёр лийын. Дарья Быкова (когыньыштынат тренерышт В.Еменгулов) ты дистанцийыштак визымше верыш лектын. Тиде ийготан-шамыч коклаштак вич километрыште Антон Хлыбов шымше, Верхушут гыч Василий Гаврилов кумшо верым налыныт.
Кучедалмаш
Тӱрлӧ кундемлаште – тӱрлӧ вер
А Шернур кундемысе патыр-влак кучедалмын тӱрлӧ видыштыже сай результатым ончыктат. Мутлан, эртыше кечылаште смешанный боевой единоборство (ММА) дене Российын первенствыштыже Александр Храбров кокымшо верым налын. Кум бойым эртарен, ончылгоч сеҥышыш лектын. Финалыште балл дене изиш почеш кодын.
Эртыше кечылаштак Калуга областьыште кум бронзо, кок ший, ик шӧртньӧ медальым налыныт.
Изирак ийготан-влакат путырак сай результатым ончыктат.
«Аkpatr» клубын воспитанникше-влак вольный кучедалмаш дене межрегиональный турнирыште М.Миронов кумшо (36 кг), Д.Мамаев (42 кг) кумшо верыш лектыныт.
Ты клубын спортсменже-шамыч Набережные Челныште эртыше вольный кучедалмаш дене всероссийский турнирыште А.Ямбарцев (55 кг) икымше, И.Мустаев (69 кг) кумшо верым налыныт.
Корэш
Нылымше гана
Нижнекамскыште заслуженный спорт мастер Д.Галеевым шарныме лӱмеш корэш дене открытый турнирыште Марий Эл гыч Муса Галлямов вийжым терген.
130 килограмм нелытан-шамыч коклаште Муса икымше верым налын. Тыгай турнирым тудо нылымше гана сеҥен, но ончыч – 100 килограмм
нелытан-влак коклаште.
Футбол
Модшо-влак пале лийыныт
«Приволжье» межрегиональный футбол клуб зональный таҥасымаште (III дивизион) модшо участник-влакым палемден. Тений элнан первенствыштыже 12 команде, кубок верч турнирыште 18 команде модаш тӱҥалеш.
Фигурный мунчалтымаш
Ий ӱмбалне – мотор таҥасымаш
Республикыште фигурный мунчалтымашат вияҥеш. Ты вид дене спорт школыш коштшо-влак пошкудо кундемыште эртаралтше турнирлаште вийыштым тергат, сай результатым ончыктат. Мутлан, шукерте огыл Озаҥ олаште фигурный мунчалтымаш дене спорт школысо тренер О.Языкован воспитанникше-влак Зоя Ковязина, Агнета Латушкина, Кирилл Поляков Татарстанысе «Стрела» ДЮСШ-ын открытый первенствыштыже призёр радамыш логалыныт.
Е.Эшкинина.
