Тунемме ий мучашке лишемме да Кугу Сеҥымаш кечым пайремлыме вашеш Марий Элым вуйлатыше Александр Евстифеев 11 апрельыште единый кугыжаныш экзаменлан ямдылалтме да самырык тукымым патриотизм шӱлышеш шуарен куштымо йодышым каҥашаш правительстве председательын алмаштышыже Степан Воронцов да образований ден науко министр Наталья Адамова дене вашлийын.
Образований ден науко министр 11-ше классыште тунемше-влаклан экзаменым кучымо тургым 27 майыште тӱҥалеш да 1 июль марте шуйна, ЕГЭ-м эртараш республикыште 23 пунктым ямдылыме манын увертарен. Комиссий-влакым чумырымо, видеоэскерымашым организоватлыме да общественный эскерыше-влакын пашашт нерген кӱлешан чыла договорым ыштыме. Тачысе кечылан базыш 3057 выпускникым пуртымо. Н.Адамован ойлымыж почеш, экзаменым кучымаште кугу вашталтыш уке. Лач математике дене экзаменыште гына тений выпускник-влак умбакыже кушто тунемаш шонымышт шот дене базовый але профильный уровеньым ойырен налшаш улыт. Тений ЕГЭ-м кучымо шотышто вуйшиймаш пурен огыл, каласен министр.
Кызыт тунемше-влакын успеваемостьышт иктешлалтеш. 9-ше ден 11-ше класслаште тунемше-влак веле огыл, тыгак нылымше классыш коштшо-шамычат шинчымашыштым ончыктышаш улыт – майыште нуно всероссийский тергымаш пашам возат. Индешымше классыште тунемше-влак нерген ойлаш гын, нуно Тӱҥ кугыжаныш экзаменлан ямдылалтыт, тудыжо ЕГЭ семын эрталалтеш. Марий Эл Минобрнаукын данныйже почеш, тушто 6 тӱжем утла школьник шинчымашыжым терга.
Самырык тукымым патриотизм шӱлышеш шуарен куштымо паша дене С.Воронцов палдарен. Тудын ойлымыж почеш, Марий Элыште патриотизм шӱлышеш воспитатлыме пашалан кугу тӱткыш ойыралтеш. Кызыт Сеҥымаш кечылан ямдылалтме паша вияҥын толеш. Парадный расчет-влакын составышкышт 10 кадет классым да «Юнармийын» еҥже-влакым пуртымо. Россий Федерацийын моло субъектше дене таҥастарымаште Марий Элысе патриотический движений ик эн шуко еҥым ушен шога, каласен правительстве председательын алмаштышыже.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
Д. Речкинын фотожо.
