1 апрель гыч 31 май марте Марий Элыште илем-влакым эрыктыме пагыт увертаралтын.
Тидын шотышто Марий Эл Республикын виктержын кӱштымашыже лектын. Оласе округ да муниципальный район администраций вуйлатыше-влак кумыдыклан санитарно эрыктыме планым ямдылышаш да пеҥгыдемдышаш улыт. Верысе кучем ден уполномоченный-влак илемым тӱзатыме шотышто пашам начарын ыштыше-влакым эскеренак шогышаш улыт, а кӱлеш гын, административно мутым кучаш шогалтенат кертыт. Санитарно эрыктыме паша чыла вере вораҥшаш. Тыгак шӱкшакым закондымын кышкыме верламат пытарыман. Чыла нине пашаш самырык-влакын мер але волнтер организацийыштым ушыман.
А кузе паша кайыме нерген республикын Пӱртӱс поянлык, экологий да йырым-йырысе средам аралыме шотышто министерстве тергаш тӱҥалеш. Экологийлан вуйын шогышо келшен толшо вес ведомство-шамычат шке полномочийыштым кӱлеш семын шуктышаш улыт.
С.Носова
