18 апрель (изарня). Кушшо тылзе Висаште. Ты шӱдыр пале кокла лектышан. Калыкыште ты кечым Федул кече семын палыме. Таче тырай помыжалтмым да леве да шокшо мардеж пуаш тӱҥалмым вученыт.
Пакчаш ош вуян, пеледышан, пекин, брокколи ковышта росотам кусарен шындаш лиеш. Тыгак теплицыш, парникыш шере пурыс росотам, вондо ден кушшо немычпурсам, кабачокым, цуккиним, кавуным луктын шындаш йӧнан кече. Вожсаскам пуышо пакчасаскам, вож дене шарлыше пеледышым шындаш (мланде кошкен шуын гын) йыраҥым ышташ лиеш. Сидератым ӱдаш мондыман огыл.
Пеледышым ончышылан чыла тӱрлӧ пеледышым, декоративный кушкылым да розам шындаш келшыше кече.
Но прививкым ышташ, тӱрло чер да шукш-копшаҥге деч обработкым ышташ ок йӧрӧ. Саскам пуышо пушеҥгым, емыж-саскан вондым, кугымӧрым шындаш йӧнан жап.
Ты кече дене кылдалтше калык пале-влак:
- Мутланыме йӱк пасушто тораш йоҥгалтеш, тугеже йӱр толеш.
- Сузо эрден эрак йӱкым пуэн кычкыра – игече вашталтеш, шып чоҥештылеш – кече юалге да пылан лиеш.
- Корем йолышто лум ушкал кап наре гына шулыде кодын, тугеже мландым куралаш ттарванаш лиеш маныныт.
- Йӱдым юалге, а кечывалым шокшо, икмыняр кече ояр да шокшо игече шогаш тӱналеш.
Р. ЧЕПАКОВА
