МЕР ИЛЫШ

Мемнам Кырла ушен

Йошкар-Оласе Шернур землячествын тенийысе икымше кугу мероприятийыже поэт да киноактер Йыван Кырлан шочмыжлан 110 ий темме лӱмеш «Муралтем мый йывыртен» поро кумылым ончыктышо концерт лийын.

Кок тылзе ончыч ятыр жап деч вара икымше гана кугу погынымашыште лӱмлӧ земляклан Шернур посёлкышто чапкӱм шогалташ кӱлмӧ, тиде амал денак концертым эртараш темлымашым рӱж вашлийыч.

Землячествыште шукертак улшыжат, пытартыш жапыште ушнышыжат концертым ямдылен, эртарен колташ вийым пыштеныт. Поро пашаш Шернур район администрацият кумылын ушнен. Кугу событий дене Марий Эл правительстве вуйлатышын икымше алмаштышыже М.Васютин, район администраций вуйлатыше С.Адиганов, землячествым вуйлатыше Е.Пайдышев саламленыт да тӱнямбал кӱкшытыштӧ палыме марийым шарнен илымылан тауштеныт.

Сценарийым, тыгак видеопрезентацийым Кырлан шочмо ялже гычак поэт да журналист З.Дудина ямдылен. Зоя Михайловна землякше нерген але марте шукылан палыдыме факт-влакым ончыктен. А такше концерт программе пӱтынек «шернур вий» дене ышталтын манаш лиеш. Виталий Шапкин, Маргарита Медикова, Александр Бирюков, Алина Егошина, вӱдышӧ-влак Сергей Мамаев ден Любовь Купсольцева, Эльвира Попова, Марина Воронцова, Игорь Антропов, Ирина Якаева, Александр Иванов, Наталья Шабдарова, хореограф Н.Макарова ( «Салика» ден «Ныжыл сем» ансамбль-влакын вуйлатышышт), посёлко гыч «Грация» коллектив, гармоньчо-влак  ансамбль… Эсогыл Марий самырык театр деч лийше мурен-куштымаш номерыште ӱдыр-влак тӱҥ шотышто Шернур вел гыч улыт. Ик эн шергыже тиде касыште, мутат уке, Йыван Кырлан шочмо Марисола кундемже гыч толшо артист-влак лийыныт. Тиде Вячеслав Дудин,  «Саскавий» ансамбль да Купсола гыч Никита, Алеша да Илья Шабдаровмыт. Кум йыгыр икшыве лачак Кырлан шочмо ялже гыч улыт. Зал кажне артистым шокшо кидсовыш дене вашлийын, но икшыве-влакым поснак йӧратен ончен. А кунам В.Шапкин «Шернур корныш легылдальым» сем аршашыжым пӧлеклаш лекте, тунам артистлан кидсовышым эсогыл чарен шогалтышыже логале. Шокташ тӱҥалмыж деч ончычак земляк-влак маэстром аклыме, жаплыме кумылыштым почын пуышт. Концерт номер-шамычым тыгак артист-влак Иван Смирнов, Иван Соловьев, гармоньчо Анатолий Ермаков келыштараш полшеныт.

М.Шкетан лӱмеш Марий национальный драме театрын воштончыш залыштыже Шернур вел ӱдырамашын эн акрет годсо тӱржым кидмастар Л.Веткинан пашаж гоч ужын кертме. Тыштак райпо ден сыр заводын кочкыш сатуштым тамлен ончаш да налаш лийын. Шернур поселко гыч толшо гармоньчо-влакын шокталтымышт почеш кушталташат ятырынак лектыныт.  

Республик кӱкшытан ты мероприятий мер калыкын тарватымыж дене ышталтын. Тушко ушнышо кажне еҥ, артист ты пашам кугу суаплан шотлен, сандене икте кодде яра ыштен. А ончаш толшо-влак коклаште марийжат, рушыжат, Морко, Волжский, Марий Турек, Кужэҥер да моло район гычат лийыныт. Вет нуным чылаштым театрыш Кырла ушен. Тидыжак мыланна ик эн шерге.

С.Пехметова.

Э.Монахован фотожо.

Опубликовать в Одноклассники

Добавить комментарий