Мурманскыште эртыше «Йӱдвел пайремыште» Марий Эл гыч ечызе Станислав Егоров кок стартыште лу эн тале спортсмен-влак коклаш логалын.
Тренер Е.Рыбаковын воспитанникше 15 километр кужытышто классик йӧн дене кандашымше, 10 километрыште эрыкан йӧн дене кудымшо, эше 50 километрыште (марафон) кудымшо лийын. Марафонышто икымше гыч кудымшо верым налше-влакым саламленыт, окса премийым кучыктеныт. Кумшо призёрлан ик минутлан сеҥалтын.
Ме шокшын саламлена.
Шарналташ уто огыл: 2017 ийыште Йӱдвел ечыгорнышто С.Егоров (УОР, СШОР «Виктория», МРМТ, Параньга район, Матародо села гыч) 15 километрыште кумшо верыш лектын, а ӱмаште 50 километрым куржмаште финишыш 16-шо пурен.
Тиде таҥасымаштак Морко районысо Элекэҥер ял гыч Николай Васильев вийжым терген. Николай 15 километрыште (классик йєн) 39-ше верым налын.
Е.Эшкинина.
