11 апрель (изарня). У тылзе Ракыште. Тиде шӱдыр пале чапле лектышанлан (лышташ кече) шотлалтеш. Пакчасе теплицыш ковышта, тыглай, шнитт-шоган,, чернушко-шоган, кресс-салат, лышташан горчице, укроп, немычпурса, нӧшмым ӱдаш келшыше кече. Ончыч шндыме кушкыл росотам пикироватлаш йӧнан.
Таче кушкыл вожлан минеральный да органический ӱяҥдышан ешартыш кочкышым пуыман. Икияш да шукияш пеледыш нӧшмым ӱдаш, декоративный кушкылым шындаш шотлан толеш. Кушкылыш аярым шыжыктыман огыл. Вожсаска ден кушшо да ампельный кушкылым тӱкаш ок темлалт.
Прививкым ышташ садыште кушкыл вургым пӱчкедаш келша. Емыж да саскам пуышо вондым, пушеҥгым шындаш да кусарен шындаш лиеш.
Калык палым эскерен, ожно ты кечын куэрлаш коштыныт. Пушеҥгым ӧндалын, сок коштмым колыштыныт. Вӱд шуко гын, вашке игече шокшемдымым вученыт.
Ты кече дене кылдалтше калык пале-влак:
- 11 апрельыште игече могай, 11 октябрьыштат тыгайымак вученыт.
- Куэ гыч вӱд шуко йога, тугеже кеҥеж йӱран лиеш маныныт.
- Кӱдырчӧ эр кӱдырта, шошо мучко юалге игече шогаш тӱҥалеш.
- Таче йӱран, шыжым шӱлӧ сайын шочшаш.
- Пыл-влак ик могырыш писын ийыт, игече писын шокшемда.
- Чаҥа тӱшкан-тӱшкан чоҥештылыт, кече пыл шеҥгелан шинчеш, тугеже йӱр толеш.
- Шогертен пыжашым ӱлан опта – кеҥежым чӱчкыдын кӱдырчӧ кӱдырташ тӱҥалеш.
- Кӱседык (чибис) ӱлнӧ чоҥештылеш, ояр да кукшо игече кужун шога.
- Куэ ончыч сӧралга гын кукшо да ояр, а нӧлпӧ лышташ писынрак лопкаҥеш – ночко да йӱран кеҥежым вученыт.
11 апрель йӱдым ужмо омо 7-10 кече гыч шукталтмылан ӱшаненыт. Таче шочшо-влак поро да тыматле койыш-шоктышан лийыт. Нунылан аралтыш семын кордун да цикрон дене сӧрастарыме арверым чияш темлалтеш.
Р. Чепакова
