Таче кечылан Марий Элыште цифровой эфир телевещанийын 31 объектше пашам ышта. Тудын дене 99,7 процент калык пайдаланен кертеш.
Тиде кугу пашам «Россий Федерацийыште 2009-2018 ийлаште телерадиовещанийым вияҥдымаш» федеральный целевой кышкарыште шуктымо, да ынде цифровой эфир телевещанийын республикыште эн популярныйлан шотлалтше 20 каналжым да радиовещанийын кум станцийжым чылт яра ончаш да колышташ лиеш.
Цифровой вещанийыш куснашлан нимогай чарак уке: ны мастерым ӱжыкташ, ны пырдыжым шӱташ, ны пачер але пӧрт мучко кабельым шупшаш огеш кӱл. Тидлан улыжат телевизор, антенне да цифровой приставке (ресивер) лийшаш.
Нине технике шергакан огытыл. Адакше ик гана налат да телевизорым абонент тӱлымаш деч посна ончет. Ушештаренна ыле, пытартыш жапыште лукмо телевизорлаште ресивер уло, а теве тоштыракым цифровой приставкыш ушыман.
Цифровой телевиденийыш куснаш специальный шинчымаш огеш кӱл. Шот огешак лек гын, волонтёр-шамычым полшаш йодаш лиеш.
Таче цифровой эфир телевещаний дене кылдалтше чыла йодышым «РТРС» ФГУП-ын 8-800-220-20-02 номеран шокшо линийышкыже йыҥгыртен рашемдаш лиеш, Марий Элыште 8-8362-32-11-99 номеран шокшо линий пашам ышта. А РТРС-н порталыштыже илыме вер деке лишкырак вераҥдыме цифровой телевиденийын базыжым муаш йӧн уло.
М.ИВАНОВА
