27-29 мартыште Марий Элыште «Патриот-влак-2019» военно-патриотический слёт эртен. Тудо Медведево районысо Руэм кыдалаш школышто лийын. Организаторжо – республикысе патриотический воспитаний да спорт рӱдерын специалистше-влак, Россий ДОСААФ-ын Марий Элысе региональный отделенийжын членышт.
Ты гана тушто 19 команде вийжым терген. Волжский районысо Пӧтъял кыдалаш школ гыч юнармеец-влак икымше верым сеҥен налыныт. Нуно (Иван Кошаев, Юлия Кошаева, Иван Михайлов, Максим Степанов, Анастасия Ярутова) районын чапшым араленыт.
Модмаш кок ужаш дене кылдалтын. Иктыштыже «Таза капыште – таза уш» ГТО нормативым сдатленыт. Тыште Юл кундем гыч ӱдыр-рвезе-влак, эн шуко очком поген, икымше верыш лектыныт.
Кокымшо ужашыште «Тунеммаште неле, но бойышто куштылго» военизированный эстафетыште вийыштым тергеныт. Тушто участник-влаклан шым этапым эрташышт логалын. Мутлан, куржталмаште писылыкыштым тергеныт, автоматым (АК-74) рончен погымаште, противогазым чиен, гранатым кышкен таҥасеныт. Тыгак участник-шамыч икымше медицине полышым пуаш тунемыныт, тачысе саманлан келшыше военный вургемым, эккипировкым чиен онченыт, аварийно-утарыме службо дене палыме лийыныт. Тиде ужашыште волжан-шамыч кумшо верым налыныт
Чыла команде коклаште Пӧтъял кыдалаш школысо «Сокол» военно-патриотический клуб (вуйлатышыже – Ю. Сергеев) икымше верым сеҥен налын.
– Таҥасымаш «АрМИ-2019» тӱнямбал кӱкшытан армейский модмаш кышкарыште эртаралтын, – ойла Юрий Евдокимович. – Юнармеец-влакын программышт пайдале да кӱлешан лийын. Слёт жапыште тунемше-шамыч тазалыкым пеҥгыдемден, ГТО нормым сдатлен кертыныт. Чыла тиде нунылан воинский службым эртымышт годым кӱлеш лиеш.
Е.Эшкинина.
Снимкыште: икымше верыш лекше «Сокол» ВПК.
