ТАЗАЛЫК

Темленыт, лончыленыт да иктешленыт

Тений Марий Элыште «Здравоохранений» национальный проект кышкарыште регионысо шым проектым илышыш пурташ тӱҥалме.

Тидын дене келшышын, Тазалыкым аралыме министерствыште отрасльын вӱдышӧ специалистше-влак стратегический сессийым эртареныт, рашемденрак каласаш гын, «Шӱм-вӱргорно чер дене кучедалмаш» да «Онкологий чер дене кучедалмаш» кок проект дене пашам ыштыме сайрак да пайдалырак йӧн-влакым кычалыныт.

«Здравоохранений» проектын тӱҥ цельже – 2024 ийлан айдемын илышыжым кокла шот дене 78 ий марте шукташ, 2030 ийлан – 80 ий йотке. Тидланже шушаш вич ийыште вӱр коштмо системе дене кылдалтше черлан кӧра колымым 100 тӱжем еҥлан шотлымаште 527,4 гыч 430 марте иземдаш палемдыме, онкологий черлан кӧра колымым – 175,1 гыч 166,8 йотке, аза колымым – шочшо 1000 йочалан шотлымаште 4,6 гыч 3,9 марте.

Чыла планым илышыш пурташ шуко оксам ойырымо: онкологий программылан – 6,9 млрд. теҥгем, шӱм-вӱргорно патологий дене кучедалмылан – 380 млн. теҥгем. Тиде окса дене регионысо эмлымверлаште да поликлиникылаште медицине оборудованийым уэмдаш йӧн лиеш.

Сессийыште Тазалыкым аралыме министерствын специалистше, медицине организаций-влакын тӱҥ врачышт ден нунын алмаштышышт, ныл тӱшкалан шелалтын, цельыш шуаш полшышо темлымаш-влакым лончыленыт, эн сайжым ойырен налын, илышыш шыҥдараш палемденыт.

Регионысо тазалыкым аралыме министр М.Панькова ден Озаҥ КМУ-н проректоржо А.В.Шулаев мероприятийын пашажым сай велым акленыт да тыгай сынан сессийым умбакыжат эртараш кӱлмым палемденыт.

М.ИВАНОВА

Фотом Тазалыкым аралыме министерствын сайтше гыч налме.

Опубликовать в Одноклассники

Добавить комментарий