СОЦИАЛ ИЛЫШ

Вашке негызымат пыштат, авыренат налыт

Марий Элысе ОНФ-ын чолга еҥже-шамыч Волжск оласе Чернышевский уремыште верланыше контейнер площадкым шотыш кондыктен кертыныт: общественник-влакын верысе кучемыш лекмышт деч вара шӱкшакым погымо кумдыкым тӱрлӧ тор деч эрыктеныт.

Чернышевский уремысе контейнер площадке дене шуко пачеран да шке пӧртлаште илыше-влак пайдаланат. Нунак шӱкшакым арнялан ик гана веле лукмо шотышто вуйым шийыныт. Торым погымо верым нимо дене авырен налме огыл, тыгак тудын йыр тӱрлӧ шотан пеш шуко шӱк погынен, коклаште ртутян лампе-влакат койыт.

Калык фронтын еҥже-влак ола администрацийыш контейнер площадкым шотыш кондымо йодыш дене лектыныт. Кумдыкым тиде кечынак эрыктеныт, тыгодымак Волжск ола администраций вуйлатышын икымше алмаштышыже Алексей Веселов контейнер площадкым лишыл жапыште авырен налме, а бак-влакым бетон негызыш шындыме нерген ӱшандарен ойлен.

«Волжскышто шӱкшакым штатный режим почеш погат. Ситыдымаш-влак улыт, но нуным тӧрлен толыт. Оласе кучемын еҥже-влак дене вашлийын мутланыме годым гараж кооператив йыр шӱкшакым кышкыме санкционироватлыдыме вер-влаклан тӱткышым ойырышна. Лишыл жапыште нине кумдыкымат шотыш кондат манын ӱшанен кодына», – манеш ОНФ-ын еҥже Алексей Маторкин.

Таче Волжскышто пеҥгыде коммунал шӱкшакым погымо 124 вер уло. Южо площадкыште пластик ден кагазым погымо йоҥгыт-влакат шогат. Регионысо оператор олаште шӱкшакым ойырымо станцийым чоҥаш шона.

М.ИВАНОВА

Опубликовать в Одноклассники

Добавить комментарий