КАЛАСЕ, "МАРИЙ ЭЛ"

Кузе пайлаш?

Пелашем дене пырля илыме годым пачерым тудын лӱмеш ипотеке дене налынна. Ипотекыжым ава капитал дене шӧренна. Ынде пачерысе пай-влакым могай документ негызеш йоча-шамыч да пелаш коклаште ойырыман? Тидым шке гыч возымо тыглай документ негызеш ышташ лиеш мо?

 Н.Скворцов.

 Йошкар-Ола.

 Йодышлан вашмутым Росреестрын Марий Элысе управленийжын пресс-службыштыжо пуэныт:

 — РФ Граждан кодексын 218-ше статьяж дене келшышын, озаже улшо погылан собственность правам вес лицалан кусараш манын, ужалыме-налме, вашталтыме, пӧлеклыме але ты пого деч отказыме шотышто ойпидышым ыштыман.

Граждан кодексын 37-ше статьяжын 3-шо пунктшо дене келшышын, опекун, попечитель, нунын вате-марийышт да лишыл родо-тукымышт опекыш налме еҥ дене тыгай сделкым ыштен огыт керт. Тышке опекыш налме еҥлан пӧлеклыме але мӧҥгеш пӧртылтыде пайдаланаш пуымо ок пуро. Тыгак сделкым ыштыме але опекыш налме еҥ ден опекунын пелашыже але попечительже да лишыл родо-тукымжо коклаште суд пашам наҥгайыме годым опекыш налме еҥын лӱмжӧ дене лекташ огеш лий.

РФ Еш кодекс дене келшышын, вате-марийын тӱшка еш погыжо нунын икойыш шумым шотыш налын шелалтеш. Пырля илыме годым чумырымо пого  шотышто ойпидыш нотариально пеҥгыдемдыме лийшаш.  

Чыла тидым шотыш налын, авторын возымо случайыште вате-марийын да икшыве-влакын кусараш лийдыме погыштым смешанный ойпидыш негызеш оформитлыман. Рашрак каласаш гын, тышке пӧлеклыме шотышто, тыгак вате-марий коклаште погым шеледыме шотышто ойпидыш-влакымат пуртыман.  Тиде ойпидышат нотариально пеҥгыдемдалтшаш.

 С.Носова.  

Опубликовать в Одноклассники

Добавить комментарий