Йошкар-Ола уремлаште лакым петыркалыме паша умбакыже шуйна. Март мучашлан «Город» МУП 385 кв.м кумдык корным олмыктен шуктен.
12 уремыште, 2 проспектыште, 3 бульварыште, 2 кӱварыште лакым петыркалаш 53,2 тонн велыме асфальтобетоным кучылтмо. Тыгак корным шотыш кондаш 432 тонн тыгыде кӱ ден кермыч пудырго йӧршан вартышым шарыме.
Лишыл жапыште Красноармейский, Машиностроитель уремлаште, Воскресенский проспектыште, Царьград изуремыште корным олмыкташ тӱҥалыт.
Ты пашам ышташ келшыше кукшо игече лишеммеке да суткан кокла температурыжо 5 градус деч шокшо шогаш тӱҥалмеке, эн первыяк Первомайский, Свердлов, Зарубин уремлаште, Ленин проспектыште, Рӱдӧ кӱварыште лакылам петыркалаш шонат.
Р.Чепакова.
