Изарнян, 28 мартыште, Марий Элысе МВД-ште «йыргешке ӱстел» эртыш. Тушто кугыжаныш услугым электрон йӧн дене налмын пайдаже нерген каласкалышт. Варажым ойлышт веле огыл, мылам гын эше ончыктыштак…
Тачысе кечылан министерстве 30 наре кугыжаныш услугым, тышеч 3 — ГИБДД, 5 – увер рӱдер, 22 – миграций управлений — пуа. Но, мом шылташ, еҥ-влак кокла гыч эше моткоч шагалынже электрон йӧнлан эҥертат. Поснак кугурак ийготан-шамыч учрежденийлашке шкешт миен толаш, документым кагаз йӧн дене ямдылаш йӧратат. А вет тыге мыняр жап эрта?! Кугыжаныш услугым электрон йӧн дене налашыже моткочак куштылго. Адакшым тиде писын ышталтеш. Тидлан лӱмынак единый манме «Госуслуги» интернет-портал ышталтын.
Марий Элысе МВД-н увер рӱдер кугыжаныш услуго отделенийжын начальникше Ольга Морозова порталыште регистрацийым эртыме радам дене палдарыш. Кӧ тидым шке семынже ыштен огеш мошто але йӧнжӧ уке гын, МФЦ-шке я Марий Элысе МВД-шке миен кертыт. Тидлан пелен паспорт да СНИЛС гына лийшаш. Специалист-шамыч кӱчык жапыште тидым ыштен пуат. А тылеч вара кок минут гына эртымекак «Госуслуги» порталыште регистрироватлалтше еҥ кеч-могай услугылан, мутлан, РФ паспортым налаш але вашталташ, загранпаспортым вашталташ, штраф нерген уверым пален налаш да вигак тӱлаш, транспортым регистрироватлаш, водительский удостоверенийым налаш але вашталташ, тӱрлӧ сынан архив справкым налаш… йодмашым пуэн кертеш.
Марий Элысе МВД-н ГИБДД-жын МРЭО вуйлатышыжын сомылжым шуктышо Дмитрий Емельянов ты ведомствыште могай электрон кугыжаныш услуго дене пайдаланаш лийме нерген ойлыш. Тыгак тудо тений август гыч законодательствыште транспорт средства-влакын электрон паспортыштым да кугыжаныш регистрационный знакым пуымо дене кылдалтше лийшаш вашталтыш-влак нерген каласкалыш.
Республикысе МВД-н УВМ-жын информационный обеспечений да кугыжаныш услугым электрон йӧн дене пуымо отделенийжын начальникше Алексей Свинин Миграций йодыш шотышто управленийын пуымо кугыжаныш услугыж ден функцийже-влак дене палдарыш.
«Йыргешке ӱстелыште» тургыжландарыше йодышем пуымекем, мылам гын каласкалымым колыштмо дене веле серлагаш огыл, а тидым шкеак эртен ончаш темлышт. Мутат уке, кӧнышым. Уке гын тӱрлӧ амаллан кӧра «Госуслуги» портал дене пайдаланен кертын омыл. Мыйым министерствыште икымше пачашыште верланыше пӧлемыш пеленышт наҥгайышт. Тудо еҥ-влаклан тыгай полышым пуаш лӱмынак ышталтын. Туштыжо специалист тӧрсырым моткочак писын – лу минут наре жапыште – кораҥдышат!
Сандене, пагалыме лудшына-влак, тенданат кугыжаныш услугым налме шотышто иктаж нелылыкда лектын гын, ида ӧр, МВД-шке мийыза. Тушто кеч-кӧланат полшаш ямде улыт. МФЦ-ште семын ни талоным налшаш, ни черетым вучен шинчышаш, ни жапым йомдарышаш уке.
Любовь Камалетдинова.
