УВЕР ЙОГЫН

Келшыше илыме верым кычалыт

15 мартыште «Аргументы и факты» газетыште журналист Татьяна Богданован «Выжить на 3 тысячи в месяц. Пенсионерка должна выплачивать неподъёмный долг» статьяже лектын. Тушто 2016 ий 8 март йотке Килемар районысо Озёркадӹр ялыште илыше 72 ияш Галина Косолапован кочо пӱрымашыж нерген ойлалтеш.

Ӱдырамашын барак шотан пӧртыштӧ верланыше пачерже йӱлен. Тул пошкудын погыжымат пытарен. Страховой компаний «азапыш пуртышым» судыш пуэн. А тудыжо тугакшат нимо деч посна кодшо ӱдырамашлан 266 тӱжем теҥгем тӱлыкташ пунчалым луктын. Сакыр диабет, кугу давлений дене орланыше илалше еҥ ончыч мончаште илен, вара – кум шочшан ӱдыржӧ дене Козьмодемьянскыште… Но ласкалыкым райрӱдысӧ ик эн шулдо унагудышто айлыме пӧлемыште гына муын. Судын пунчалже почеш, 2016 ий сентябрь гыч Галина Мустаевнан пенсийже гыч ончыч 3,7 тӱжем, вара 4,5 тӱжем теҥгем кучен кодаш тӱҥалыныт. Тылеч посна ӱдырамаш айлыме пӧлемлан 4 тӱжем теҥгем тӱла, да кидешыже улыжат 3,1 тӱжем теҥге кодеш. Йочаже-влак окса шотышто полшен огыт керт.

«АиФ» газет РФ Паша министерстве, Генпрокуратурыш, Марий Элым вуйлатыше, Кугыжаныш Думо депутат да поро кумылан еҥ-влак деч илалше ӱдырамашлан полшаш йодын, вет тудын кидешыже окса илен лекташ лийме эн изи кугыт (8191 теҥге) дечат шагал кодеш.                    

Марий Элын Социальный вияҥмаш министерствыже статьяште ончыктымо факт-влакым терген да теве мом рашемден: пожар деч вара Озёркадӹр ял шотан администраций Галина Косолаповалан илыме верым ойырен, икмыняр жап гыч вес верым темлен, но пенсионеркын Козьмодемьянскыш ӱдыржӧ деке кайымыжлан кӧра социальный найм ойпидышым ыштен кертын огыл. Кодшо кечылаште Козьмодемьянск олаште калыкым социально обслуживатлыше комплексный рӱдерын специалистше-влак Галина Мустаевналан шкет илалше-влакын специальный пӧртышкышт але социальный обслуживанийын моло стационар организацийышкыже илаш куснаш, тыгодым социальный услугым мӧҥгыштак пуаш темленыт.  

 Икманаш, Галина Косолапован илыме верже шотышто лекше йодышым умбакыже лончылат.

М.ИВАНОВА

Опубликовать в Одноклассники

Добавить комментарий