27 мартыште «Корта» ече базыште ече тургымым иктешленыт. Стартыш кундемнан тӱрлӧ районжо гыч 300 утла спортсмен лектын.
Игече леве, лум шула гынат, таҥасышаш трассе моткоч чапле лийын. Кажне тӱшкаште шке сеҥышым ойыреныт. Нунылан Чап грамотым кучыктеныт.
28 мартыште ты верыштак изирак ийготан спортсмен-шамыч коклаште таҥасымаш лийын. Ечыгорнышто эсогыл йочасадыш коштшо-влакат вийыштым тергеныт. Сеҥыше ден призёр радамыш лекше-шамыч Чап грамот деч посна шарнымашан пӧлекым кучыктеныт.
Ийготым шотыш налын, шке тӱшкаштышт Анна Рулина (Санчурск), Павел Незнаев (Знаменский), Настя Якимова (Красногорский), Миша Максимов (Куяр), Настя Аверьянова (Памар), Даниил Костерин (Санчурск) ончыл верыш лектыныт. Эн изи ечызе Йошкар-Ола гыч Костя Сергеев лийын.
– Ече тургым иктешлалтын. Чыланат финишыш толын шуында, сай результатым ончыктенда. Ужына: самырык ўшанле вашталтыш кушкеш. Таче ойыртемалтше кокла гыч, илен-толын, Марий Элын чапшым Россий кӱкшытыштє аралышат лиеш манын пеҥгыдын ӱшанена, – мане саламлымыж годым «Виктория» спорт школын директоржо А.Захаров.
– Пытартыш ийлаште меат ече спортым вияҥдаш тӱҥалынна. Ӱдыр-рвезе-влак сай результатым ончыктат. Теве таче ача-ава-влак икшывыштым лўмынак шке автомашинашт дене конденыт, – ойла Волжский район Памар кыдалаш школышто физкультурым туныктышо В.Юрков. – Тиде кечылаште мемнан школ гыч икмыняр йоча республикын чапшым арала.
Е.Эшкинина.
Снимкыште: «Мыланем ече дене мунчалташ моткоч келша. 27 мартыште шке тӱшкаштем икымше лийынам», – ойла Санчурск гыч сеҥыше А.Рулина.
Авторын фотожо.
