Республикым вуйлатыше Йошкар-Олаште Изи Какшан эҥер серыште пашаче совещанийым эртарен. Тушто набережныйыште да тудын воктенысе каныме верлаште инфраструктурым вияҥдыме йодышлам каҥашеныт.
Кундемым вуйлатыше олан мэрже Евгений Масловлан ятыр йодышым пуэн. Тудо оласе кучем эҥер серым кунам умбакыже тӱзаташ тӱҥалеш манын йодыштын.
Объектыште чоҥымо тӱҥ пашам 2009 ийыштак мучашке шуктымо. Кызыт 2019 ий, но тышке толын каналташ огеш лий, космодромысо семын чумыр кумдыкым кӱ дене комыжлымо. Ни шинчын каналташ, ни стационарный торговльо уке, ни биотуалетым вераҥдыме огыл, стакан вӱдымат налын йӱаш нигушто, ик пушеҥгат, вондерат уке, каласен Александр Евстифеев.
Йошкар-Олан мэрже Евгений Маслов эҥер серыште торгайыме стационарный огыл объект, изи архитектурный формо-влакым, тыгак санитарный кӱлешлыкан объект-шамычым вераҥдыме проектым ыштен шуктымо манын. Тыге, тудын ойлымыж почеш, кок тўрлє киоск-влакым вераҥдаш пелемдыме, ик тӱрлыштыжє сувенирым, вес тӱрлыштыжӧ бакалей продукцийым ужалаш тӱҥалыт. Шокшо кочкышым ужалыме вер-влакат лийыт. Тылеч посна эҥер серыште икмыняр велопрокат пунктым почаш шонат.
Киоск-влак набережныйын стильже дене келшен толшо, национальный ойыртеман лийыт, теҥгыл ден урно-влакым вераҥдена. Чыла тидыже ончыкыжо бюджетым ешарен пойдарыше верыш савырна, каласен Евгений Маслов республикым вуйлатышылан.
Дева Мария площадьым ончен коштмо годым Александр Евстифеев кермыч дене кужу жап чоҥалтше ик объектлан тӱткышым ойырен. Тудым эше профильный лист дене печен налме, но пече локтылалташ тӱҥалын, чыла тидыже площадьым нимыняр огеш сылнештаре.
Тиде объект дене те мом ышташ шонеда? Эреак тыге шогаш тӱҥалеш? Тарванылза, закон тыланда чыла полномочийым пуа. Собственник-влакым ӱжса, мучаш марте чоҥен шуктыза але тек рончат. Мый законым пудырташ але бизнес ваштареш кредалаш тендам ом ӱж. Чылажымат шотыш кондыза, но тыге кодаш огеш лий, каласен мэрлан Александр Евстифеев.
Ушештарена: 2020 ийыште Марий Эл республикым ыштымылан 100 ий теммым палемда. Тиде кугу событийлан кызыт чыла кӱкшытыштӧ ямдылалтыт. Ончыкылык пайремын рӱдӧ верже семын Йошкар-Олалан поснак кугу тӱткыш ойыралтеш.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
Д. Речкинын фотожо.
