ЯЛОЗАНЛЫК

«Лукоз» шорык шӧрымат темлынеже

Александр Евстифеев «Лукоз» агрохолдингын вуйлатышыж дене  вашлийын. Нуно республикыште казам ашныме да каза шӧр  гыч  тӱрлӧ  кочкышым ыштен лукмо, агрохолдингым умбакыже вияҥдыме нерген  мутланеныт.

Марий Элым вуйлатыше предприятийын пашажым вес субъектлаштат вияҥден колтен кертме нерген йодыштын.

«Ончышаш паша радамыште  икмыняр йодыш уло: Марий Эл Республик ден Башкортостан Республик  коклаште кутырен келшыме почеш  паша кузе шукталтеш? Кокымшо: Россий президентын посланийыштыже да нацпроектлаште тӱнямбал экономический пашам вияҥден колтымо нерген ойлалтеш, ты шотышто те кузерак пашам ыштеда? Кумшо: инвестиционный планда дене палдарыза»,- палемден мутланышаш теме-влакым республикым вуйлатыше.

Агрохолдингым вуйлатыше  Владимир Кожанов озанлыкын ончыкылык планже дене палдарен. Теве кызыт Башкортостанын еҥже-влак дене  тушто шӧрым пуышо шорык фермым почмо нерген йодышым каҥашат. Агрохолдингын тӱҥ  пашажлан каза шӧрым ыштен налмаш шотлалтеш гынат, пошкудо кундемыште  темлыме проектат оҥайла чучеш, каласен озанлык вуйлатыше.

Предприятий экспортым  кугемден толаш  тырша, шке сатужым Объединенный Араб Эмиратыш  колташ тӱҥалаш ямдылалтеш. Тылеч посна  Казахстан дене партнер кылым  пеҥгыдемдынена. Китайысе рынкыш лекташат  йӧн уло.

«Ме кызыт Федераций Советыште комитет председатель, Россий – Китай  келшымаш обществым вуйлатыше Дмитрий Федорович Мезенцев дене мемнан республикыште  ты обществын филиалжым почмо нерген мутланена. Тидыже мемнан ялозанлык продукцийнам ты элыш ужалаш корным почаш полшен кертеш. Мый Федераций Советыште Марий Эл тӱҥ шотышто чыве шыл дене верысе калыкын кӱлешлыкшым 350 процент нарылан  шукта манын ойленам ыле. Тидымат ончыкылык инвестиционный пашадан ик ужашыже семын аклен кертыда», –  каласен  Александр Евстифеев.

Республикым вуйлатыше вашлиймаште эше ик йодышым тарватен. Тиде  – кормам ыштен налмаш да тудым элыште веле огыл, тыгак вес кугыжанышлашке  ужалымаш.

Владимир Кожанов тыге вашештен: «Кызыт агрохолдинг  шке вийже дене 1000 наре гектар мландым  куралын ӱда, тений ты кумдыкым ешараш палемдалтеш. Тӱҥ культур – шукияш шудо. Шудым перерабатыватлен, гранулыш савырен ужалена. Кызытеш Российыште гына, ончыкыжо вес эллашкат лекташ шонена».

Владимир Кожановын ойлымыж почеш, агрохолдинг  лукмо продукцийын ассортиментшым эреак  пойдарен шога. Ик эн   у кочкыш – «Моцарелла» да бэби-сыр. Предприятий  Российыште эртыше «Продэкспо»  кугу выставкыште  куд тӱрлӧ  сатужым ончыктен да шєртньє медаль дене палемдалтын. Кодшо ийыште продукцийым ужалымаш 24 процентлан ешаралтын, а тений кок тылзыште  23 процентлан кушкын.

 

Марий Эл Республикым  вуйлатышын организаций да аналитике виктемжын  уверже негызеш П.Шакиров ямдылен 

Д. Речкинын фотожо.

Опубликовать в Одноклассники

Добавить комментарий