20 гыч 27 март марте республикнан рӱдолаштыже «Театральный Йошкар-Ола» фестиваль эртен.
Йыван Кырла лӱмеш национальный премийым налшаш верч республикысе чыла театр, «Всё» усталык ушем шке пашаштым аклаш луктыныт. Лач пытартышыже конкурсыш ушнен огыл.
Арня жапыште Йошкар-Олаште илыше да тудын унаже-влаклан 11 постановкым ончен кертыныт. Спектакльын сценографийжым, режиссуржым, артист-влакын рольым модмыштым, содержанийым тӱрыс почын пуымыштым Моско, Челябинск гыч толшо критик-влак акленыт.
М.Шкетан лӱмеш Марий национальный драме театр ты гана молан лачшымак нине постановкым ончыктен? Ты шотышто театрын художественный вуйлатышыже В.Пектеев тыгерак ойлыш:
— Тиде тургымышто ме шуко премьер дене калыкым куандарышна: «Элнет», «Кӧ кечым пӧртылта», «Ӱжында?», «Югорно», «Салика». Чылажат виян улыт, кажныжым фестивальыш луктын кертына ыле. Но фестивальын йодмашыж почеш, кок спектакльым веле темлаш лиеш. Сандене ме кок тӱрлӧ постановкым: самырык-влаклан келшыше «Вий-ар – ме» рок оперым да Сергей Григорьевич Чавайнын юбилейжылан пӧлеклыме «Элнет» драмым луктынна.
Чынак, кок спектакльжат виян, калыклан келшыше улыт, критик-влакат тӱҥ шотышто нуным сайын акленыт, но икмыняр уто-ситым садак палемденыт.
— «Вий-ар – ме» — кугу, неле да сай паша. Артист-влак образым келгын почын пуэныт, нунын костюмыштат чапле. Муро-влакым сайын чумырымо, мастарын калык ончыко лукмо, — палемден жюри член Армине Оганесян.
Марий драме театрын пашаже шотышто вес жюри член Владимир Спешковынат ойлымыжо келшен: «Тендан дене нигунам йокрок огыл. «Вий-ар – ме» – кугу форман чын спектакль. Сценысе кредалмаш чоным тарвата, тургыжланаш тарата. Тиде – искусствын вийже».
Сеҥыше-влакым Тӱнямбал театр кечылан пӧлеклалтше пайремыште саламленыт. Тудо 27 мартыште Э.Сапаев лӱмеш опер да балет академический театрыште эртен. Молгунамсе семын залыште тыглай ончаш толшо-влак огыл, а республикысе театр-влакын артистышт, режиссёрышт, икманаш, спектакльым сценыш лукмаште тыршыше-влак лийыныт. Пайрем дене нуным Марий Эл правительстве председательын икымше алмаштышыже Михаил Васютин, тӱвыра, печать да калык-влакын пашашт шотышто министр Константин Иванов саламленыт да театр-влакын икмыняр пашаеҥыштлан правительствын, культур министерствын Чап кагазыштым, Таумутыштым кучыктеныт.
Пайрем программе мурылан поян лийын. Нуно рушла, англичанла, французла йоҥгеныт, но тыгодым сылне марий мурымат колыштмо шуын. Балет куштымашат кумылым нӧлтен.
Сеҥыше-влакым тӱлӧ номинацийыште палемденыт:
— Гран-при — «Йӱд орол» (Республикысе курчак театр);
— Эн сай режиссур — Владислав Константинов (Г.Константинов лӱмеш руш драме академический театр, «Аферисты»);
— Эн сай сценографий — Сергей Таныгин (Республикысе курчак театр, «Йӱд орол);
— Оперыште эн сай партий — Эльвира Гурьева (Э.Сапаев лӱмеш опер да балет академический театр);
— Балетыште эн сай партий — Кристина Михайлова, Артём Веденкин (Э.Сапаев лӱмеш опер да балет академический театр, «Чодыра сем»);
— Драме спектакльыште эн сай ӱдырамаш роль — Сергей Васин (Г.Константинов лӱмеш руш драме академический театр, «Аферисты»);
— Драме спектакльыште эн сай пӧръеҥ роль – Николай Марышев (Курыкмарий драме театр);
— Курчак театрыште эн сай роль — Максим Белецкий (Республикысе курчак театр, «Йӱд орол») ;
— Кокымшо планан эн сай пӧръеҥ роль — Игорь Актуганов (Марий самырык театр, «Недоросль»);
— Кокымшо планан эн сай ӱдырамаш роль — Наиля Сулейманова (Г.Константинов лӱмеш руш драме академический театр, «Аферисты»);
— Эпизодысо эн сай роль — Алевтина Смирнова (Э.Сапаев лӱмеш опер да балет академический театр),
– Валерий Григорьев (Марий самырык театр, «Зимы не будет»);
— Жюрин посна ямдылыме премийже — актёр-влакын дуэтышт Акпарс Иванов, Светлана Александрова (М.Шкетан лӱмеш Марий национальный драме театр, «Элнет»),
– М.Шкетан лӱмеш Марий национальный драме театрын актер ансамбльже («Вий-ар – ме»),
– Василий Пектеев (М.Шкетан лӱмеш Марий национальный драме театр («Элнет»);
— СТД-н премийже – Сергей Мамаев (Марий самырык театр);
— «Зритель-влакын симпатийышт» приз — Александр Столбов (Э.Сапаев лӱмеш опер да балет театр, «Евгений Онегин»);
— «За честь и достоинство» — Василий Пектеев (М.Шкетан лӱмеш Марий национальный драме театр);
— Йошкар-Ола мэрын премийже — Иван Егоров (композитор);
— Директорын премийже — Зинаида Долгова (Марий самырык театр);
— СТД председательын премийже — Борис Маклашин (Йошкар-Оласе художественный училище).
Ик арня моткоч писын эртен кайыш. Сеҥыше-влакат пале улыт. Ты гана марий артист-влак премий дене шагалын палемдалтыныт. Туге гынат уэш вес фестивальлан ямдылалташ тӱҥалман. Спектакльым аклыше жюрилан республикнан рӱдолаже, тӱвыра, сымыктыш поянлыкнам аралыме, тукым гыч тукымыш шуйымо пашам мастарын виктарыме да театр-влакын уста, кӧргӧ виян профессионал улмышт, кажне гана фестивальыш оҥай да тӱрлӧ шӧрынан пашам лукмышт моткоч келшен.
А.Байкова
М.Скобелевын фотожо
