Лум шулен пытыме деч вара рӱдола кумдык ару да яндар лийже манын, ола округышто 1 гыч 30 апрель марте шошо месячникым увертарыме.
Йошкар-Ола мучко 19 да 26 апрельыште субботникым эртарыме кечым пеҥгыдемдыме. Тидын дене келшышын, виктарыше организаций-влаклан, илыме фондым обслуживатлыме сферыште пашам ыштыше юридический да физический лицалан, шуко пачеран пӧртым шотышто кучышо ТСЖ, ТСН, ЖСК, ТОС-шамычлан 5 апрель марте калык коклаште субботникым эртарен колтымо шотышто умылтарымаш пашам эртараш кӱштымӧ.
Ола администрацийын ола озанлык управленийлан корно, тротуар, газон, сквер, парк, бульвар кумдыкласе шӱкым погымо да кораҥдыме, пушеҥгым ошемдыме да моло пашам жапыштыже шукташ субботникыш лекше-влаклан шӱкым оптымо мешакым, инвентарьым ямдылаш, транспортым да моло кӱлешым ситараш кӱштымӧ.
Р.Чепакова.
